બાબર આઝમની કપ્તાની સંકટમાં, શાહિદ આફરીદીના નિવેદને ઉભી કરી બબાલ

થોડા સમય પહેલા સુધી પાકિસ્તાની ક્રિકેટના સુપરસ્ટાર ગણાતા કેપ્ટન બાબર આઝમ હાલ સાઇડલાઇન્સ પર છે. એક સપ્તાહ પહેલા પૂર્વ કેપ્ટન અને મુખ્ય કોચ મિસ્બાહ-ઉલ-હકે કહ્યું હતું કે પાકિસ્તાન ક્રિકેટ બોર્ડ (PCB)ના કેટલાક લોકો બાબરને સાઇડલાઇન કરવાનું કાવતરું ઘડી રહ્યા છે. સંયોગ જુઓ, પીસીબીના વચગાળાના મુખ્ય પસંદગીકાર રહી ચૂકેલા આફ્રિદીએ શુક્રવારે 20 જાન્યુઆરીએ આ સંદર્ભમાં મોટું નિવેદન આપ્યું હતું. તેમણે કહ્યું કે પાકિસ્તાન વિભાજિત કેપ્ટનશિપના માર્ગ પર આગળ વધવા માટે તૈયાર છે. એટલે કે આવનારા સમયમાં બાબર આઝમ પાસેથી કપ્તાની જવી નિશ્ચિત જણાય છે.

બાબર આઝમનું કદ ઘટાડવાની તૈયારી

શાહિદ આફ્રિદીના મતે, આગામી સમયમાં પાકિસ્તાની ક્રિકેટને રમતના ત્રણેય ફોર્મેટ ટેસ્ટ, વનડે અને ટી-20 માટે ત્રણ અલગ નહીં પરંતુ બે અલગ-અલગ કેપ્ટન જોવા મળશે. જો આફ્રિદીનું માનીએ તો ટેસ્ટ અને વનડે માટે એક સુકાની હશે અને T20 ટીમના નેતૃત્વની જવાબદારી અન્ય ખેલાડીને આપવામાં આવશે. હાલમાં બાબર આઝમ ત્રણેય ફોર્મેટમાં પાકિસ્તાન ટીમની કેપ્ટનશીપ કરી રહ્યો છે અને તેની સતત ટીકા થઈ રહી છે.

બાબર આઝમનું બેડ લક 

2021માં આયોજિત T20 વર્લ્ડ કપ પર નજર કરીએ તો બાબર આઝમની કેપ્ટન્સીમાં પાકિસ્તાનનું પ્રદર્શન નિરાશાજનક રહ્યું છે. UAEમાં આયોજિત T20 વર્લ્ડ કપમાં સેમિફાઇનલમાં તેનો પરાજય થયો હતો. આ પછી ઓસ્ટ્રેલિયામાં આયોજિત આ જ ટૂર્નામેન્ટમાં તેમને ફાઇનલમાં ઇંગ્લેન્ડ સામે હાર મળી હતી. વર્તમાન સિઝનમાં બાબરની ટીમ ઘરઆંગણે પણ હારતી રહી. પહેલા તેને ઓસ્ટ્રેલિયાએ ટેસ્ટ શ્રેણીમાં પરાજય આપ્યો હતો. આ પછી ઇંગ્લેન્ડે ટી-20 શ્રેણીમાં હરાવીને ટેસ્ટમાં 3-0થી ક્લીન સ્વીપ કર્યું હતું. ન્યૂઝીલેન્ડ સાથેની તાજેતરની ટેસ્ટ શ્રેણી ડ્રો રહી હતી પરંતુ વનડે શ્રેણીમાં બાબર એન્ડ કંપનીને ફરી એકવાર હારનો સામનો કરવો પડ્યો હતો.

પાકિસ્તાન માટે વિભાજિત કેપ્ટનશીપ જરૂરી છે - શાહિદ આફ્રિદી

પાકિસ્તાન ક્રિકેટમાં વિભાજિત કેપ્ટનશિપના વિકલ્પ વિશે વાત કરતા આફ્રિદીએ કહ્યું, “પ્રયોગ કરવાથી નુકસાન થાય છે, પરંતુ હારથી ડરશો નહીં, તે પણ રમતનો એક ભાગ છે. આ તમને અનુભવ આપે છે. બાબરે કેપ્ટન તરીકે ઘણા સુધારા કરવાની જરૂર છે. હું રમતના ત્રણેય ફોર્મેટ માટે ત્રણ અલગ-અલગ કેપ્ટન રાખવાનાં પક્ષમાં નથી. તેના બદલે વનડે અને ટેસ્ટ માટે એક કેપ્ટન અને ટી-20 માટે અલગ કેપ્ટનની નિમણૂક કરી શકાય છે. પીસીબી પાસે હાલમાં બાબર મુદ્દે નિર્ણય લેવાનો સમય છે."