વાઘ-બકરી ચાના એક્ઝિક્યુટિવ ડિરેક્ટર પરાગ દેસાઈનું આકસ્મિક નિધન થતાં ગુજરાતના ઉદ્યોગ જગતમાં મોટો શોક જોવા મળ્યો છે. થોડા દિવસો પહેલાં બ્રેઈન હેમરેજ થયું હતું અને તેમની સારવાર ચાલી રહી હતી, દરમિયાન રવિવારે તેમનું નિધન થયું હતું. 23 ઓક્ટોબરના સોમવારે સવારે 9 વાગ્યે થલતેજ સ્મશાન ગૃહ ખાતે તેમની અંતિમયાત્રા નીકળશે.
પરાગ દેસાઈ છેલ્લા કેટલાક સમયથી વાઘ બકરી ગ્રુપનો ચહેરો હતા. લોંગ આઇલેન્ડ યુનિવર્સિટી, યુએસએમાંથી MBA થયેલા દેસાઇ 1980ના દાયકાના મધ્યમાં વાઘ બકરીના વિકાસના પ્રયત્નોને આગળ વધારવા માટે અમદાવાદ પરત ફર્યા હતા. 1995માં વાઘ બકરી ટી કંપનીનું કુલ ટર્નઓવર 100 કરોડ રૂપિયાથી ઓછું હતું. હાલમાં તે વાર્ષિક રૂ. 2000 કરોડને પાર કરી ગયો છે. કંપનીની વાત કરીએ તો હાલમાં વાઘ બકરી ચા દેશના 24 રાજ્યો અને વિશ્વના 60 દેશોમાં નિકાસ કરવામાં આવે છે. અમદાવાદથી આગળ દેશના અન્ય ભાગોમાં ગ્રુપના વિસ્તરણ અને નિકાસ માટે એમનું યોગદાન રહેલું છે. તેમણે આઈસ્ડ ટી અને કોફી જેવા ઉત્પાદનોમાં પણ બ્રાન્ડનો વિસ્તાર કર્યો અને buytea.com નામની વેબસાઈટ સાથે તેની ઈ-કોમર્સ પહેલનું નેતૃત્વ કર્યું, પરાગ દેસાઈ વાઘ બકરી ટી ગ્રુપમાં એક્ઝિક્યુટિવ ડિરેક્ટર અને 4થી પેઢીના ઉદ્યોગસાહસિક હતા. તે એક તે ગ્રુપના આંતરરાષ્ટ્રીય વ્યાપાર, વેચાણ અને માર્કેટિંગનું નેતૃત્વ પણ કરતા હતા.
પરાગભાઈ અગ્રણી ઉદ્યોગ પ્લેટફોર્મ જેમ કે કોન્ફેડરેશન ઓફ ઈન્ડિયન ઈન્ડસ્ટ્રી (CII) અને ઘણી વધુ આંતરરાષ્ટ્રીય સંસ્થાઓ પર સક્રિય હતા. તે ઉત્તમ વક્તા હતા. તેમણે નવીન માર્કેટિંગ, બ્રાન્ડિંગ અને પેકેજિંગ વ્યૂહરચના અપનાવીને બ્રાન્ડનું વિસ્તરણ કરવા માટે મહત્વની ભૂમિકા ભજવી હતી. જેના માટે તેમને અમદાવાદ મેનેજમેન્ટ એસોસિએશન દ્વારા પુરસ્કાર આપવામાં આવ્યો હતો. તેમણે વાઘ બકરી ટી ગ્રૂપના ટી લાઉન્જ, ઈકોમર્સ અને ડિજિટલ અને સોશિયલ મીડિયામાં પરિવર્તનનું નેતૃત્વ કર્યું છે. તેમને મુસાફરી, વન્યજીવન અને વૈશ્વિક સ્તરે સંબંધિત પર્યાવરણીય ટકાઉપણું પ્રોજેક્ટ્સમાં ભાગ લેવાનું પસંદ હતું.