પતિ સાથે નોકરી કરવાની ઈચ્છા ધરાવતી ગર્ભવતી મહિલા પોલીસનું અકસ્માતમાં નિધન

વલસાડ જિલ્લાના પારડી પોલીસ મથકમાં ખડકી બીટમાં છેલ્લા બે વર્ષથી એએસઆઈ તરીકે ફરજ બજાવતા અનિલાબેન ભાવેશભાઈ ચૌધરી (29) (રહે. માંડવી)ના પતિ ભાવેશભાઇ ચૌધરી બારડોલી પોલીસ મથકમાં રાઇટર તરીકે ફરજ બજાવે છે. તેમના લગ્નને એક વર્ષ પૂરૂ થયું છે. મહિલા એએસઆઇ ગર્ભવતી અને નવમો મહિનો ચાલે છે. ત્યારે વલસાડ જિલ્લા પોલીસમાં એએસઆઇ તરીકે ફરજ બજાવતી ગર્ભવતી મહિલા પોલીસ કર્મચારી બારડોલી પોલીસ મથકમાં ફરજ બજાવતા પતિ સાથે નોકરી કરવાનું સ્વપ્ન લઇ બદલી કરાવીને સોમવારે સુરત એસપી ઓફિસથી ઓર્ડર લઇને કારમાં પરત ફરતી હતી. આ દરમિયાન પલસાણાના તરાજ ગામની સીમમાં સાંજના સમયે પાછળથી કોઇ વાહન ચાલકે કારને ટક્કર મારતા ડિવાઇડર કૂદીને સામેના ટ્રેક પર સ્વીફટ કાર સાથે અથડાતા અકસ્માત થયો હતો. જેમાં ગર્ભવતી મહિલા પોલીસનું સ્થળ પર જ મોત થતા પતિ સાથે ફરજ બજાવવાનું સ્વપ્ન રોળાયું છે. જ્યારે આ અકસ્માતમાં ગંભીર રીતે ઈજાગ્રસ્ત થયેલા અન્ય એક યુવકનું સારવાર દરમિયાન મોત નિપજ્યું છે. અકસ્માતની ઘટનાથી પોલીસબેડામાં શોકની કાલીમા છવાઇ ગઇ હતી.