ગુજરાતનો દરિયાકાંઠો હવે ડ્રગ્સની હેરાફેરી કરવાનું એપી સેન્ટર બની રહ્યું છે. છેલ્લા કેટલાક સમયથી રાજ્યભરમાંથી વિવિધ જગ્યાએ કરોડો રૂપિયાનો ડ્રગ્સનો જ્થ્થો ઝડપાઇ રહ્યો છે. ડ્રગ્સના દૂષણને ડામવા માટે વિવિધ એજન્સીઓ કામે લાગી ગઇ છે. ત્યારે ગુજરાતના દરિયાકાંઠા વિસ્તરમાંથી 400 કરોડના 77 કિલો ડ્રગ્સ સાથે વધુ એક બોટ ઝડપાઇ છે. કચ્છના જખૌ દરિયા કિનારેથી 6 પાકિસ્તાનીઓની ધરપકડ પણ કરી હોવાનું સામે આવ્યું છે. ડ્રગ્સના આ દૂષણને પકડવા માટે ગુજરાત ATS અને ભારતીય કોસ્ટગાર્ડ દ્વારા એક સંયુક્ત ઓપરેશન હાથ ધરવામાં આવ્યું હતું. જેમાં અલ હુસેની નામની બોટ ડ્રગ્સ સાથે ઝડપાઈ હતી.
પ્રાપ્ત માહિતી અનુસાર બાતમીના આધારે ગુજરાત એટીએસ અને ભારતીય કોસ્ટગાર્ડ દ્વારા એક સંયુક્ત ઓપરેશન હાથ ધરવામાં આવ્યું હતું. જેમાં કચ્છના જખૌ દરિયાકિનારેથી પાકિસ્તાની બોટ 'અલ હુસેની' માંથી 400 કરોડ રૂપિયાનું 77 કિલો ડ્રગ્સ ઝડપાયું હતું. એટલું જ નહીં જખૌ દરિયાકાંઠે ઓપરેશન દરમિયાન 6 પાકિસ્તાની શખ્સોની પણ ધરપકડ કરવામાં આવી હતી. હાલ તમામ લોકોને કસ્ટડીમાં લઈને તેમની પુછપરછ કરવામાં આવી રહી છે.
એટલું જ હીં, ગુજરાત ATS અને ભારતીય કોસ્ટગાર્ડ પાકિસ્તાની શખ્સોની પુછપરછ કરી આગળની કાર્યવાહી હાથ ધરી છે, આ ડ્રગ્સ કોને મોકલ્યું હતું? અને ક્યાં મોકલવાનું હતું? આ ડ્રગ્સકાંડનું કનેક્શન સહિતના તમામ પાસાઓને આવરી લઈને તેમની પુછપરછ કરવામાં આવી રહી છે.
અત્રે નોંધનીય છે કે છેલ્લા એક વર્ષમાં રાજ્યની વિવિધ એજન્સીઓએ અમદાવાદ સહિત રાજ્યભરમાંથી કરોડો રૂપિયાનું અલગ અલગ પ્રકારનું ડ્રગ્સ ઝડપ્યું છે, જેમાં ખાસકરીને લોકડાઉન પછી ગુજરાતમાં ડ્રગ્સનો કારોબાર વધ્યો છે.