શિયાળામાં શાકભાજીની આવક બજારમાં વધતાં શાકભાજીના ભાવ તળિયે પહોંચ્યા છે. શાકભાજીના ભાવ ઘટતાં લોકોએ રાહત મળી છે ત્યારે શાકભાજીનો વિપુલ પાક ખેડૂતોને પરેશાન કરી રહ્યો છે. સામાન્ય રીતે શિયાળાની ઋતુ એટલે લીલા શાકભાજી ખાવા અને તંદુરસ્ત રહેવાની સીઝન, પરંતુ લોકોની તંદુરસ્તી માટે ખેતરોમાં કાળી મજૂરી કરતા ખેડૂતો શાકભાજીનો પાક મબલક પાકતાં પસ્તાઈ રહ્યા છે. શહેરીજનોને શિયાળામાં શાકભાજીના ભાવ ઓછા થતાં બખ્ખા થયા છે. જે શાકભાજીના ભાવ ગત મહિને આસમાને હતા એ આજે તળિયે પહોંચ્યા છે. શિયાળાની ઋતુમાં લીલા શાકભાજીઓનું મબલક ઉત્પાદનને પગલે એપીએમસી બજાર શાકભાજીથી ઊભરાય રહ્યું છે.શિયાળામાં શાકભાજીના ભાવમાં ઘટાડો થતાં ઉપભોગતાએ રાહત લીધી છે, પરંતુ બીજી તરફ દિવસ-રાત ખેતરમાં મહેનત કરતા ખેડૂતોની પરિસ્થિતિ પાછી ઠેર ને ઠેર રહી છે. કુદરત રૂઠે અને ઓછો પાક થાય તોપણ ખેડૂતોની હાલત કફોડી હોય છે, જ્યારે ઉપરવાળો છપ્પર ફાડીને મબલક પાક આપે તોપણ ખેડૂતોની હાલત દયનીય થઈ રહી છે. ખેડૂતો ખેતરમાં થયેલી શાકભાજીનો વિપુલ જથ્થો બજારમાં ઠાલવી રહ્યા છે, પરંતુ એપીએમસી બજારમાં શાકભાજીની આવક વધતાં તેના ભાવમાં ઘટાડો થયો છે, ત્યારે શાકભાજીના પાકનું ઓછું વળતર મળતાં ખેડૂતોને ટ્રાન્સપોર્ટેશન પણ પોષાય એમ નથી, ત્યારે ખરેખર ખેડૂતોની સ્થતિ એક સાંધે અને તેર તૂટે તેવી થઈ છે.