કેરળના વાયનાડ જિલ્લામાં તાજેતરમાં થયેલા ભૂસ્ખલનમાં મૃત્યુઆંક વધીને 156 થઈ ગયો છે. આ ઘટના અતિશય વરસાદ અને ભૂસ્ખલનને કારણે બની છે, જેના કારણે આ વિસ્તારમાં મોટાપાયે વિનાશ થયો છે.
રાહત અને બચાવ કામગીરી ઝડપી ગતિએ ચાલી રહી છે, પરંતુ ખરાબ હવામાન અને સતત વરસાદને કારણે મુશ્કેલીનો સામનો કરવો પડી રહ્યો છે. સ્થાનિક વહીવટીતંત્ર અને NDRF (નેશનલ ડિઝાસ્ટર રિસ્પોન્સ ફોર્સ)ની ટીમોએ આ વિસ્તારમાં રાહત શિબિરો સ્થાપી છે અને અસરગ્રસ્ત લોકોને સુરક્ષિત સ્થળોએ ખસેડવાનો પ્રયાસ કરી રહી છે.
ઇજાગ્રસ્ત 192 લોકોની વિવિધ હૉસ્પિટલોમાં સારવાર ચાલી રહી છે. ગંભીર રીતે પ્રભાવિત વિસ્તારોમાં બચાવદળ પહોંચી ના શકવાના લીધે ગુમ થયેલા લોકોની સંખ્યા 98 થઈ ગઈ છે.
ચાઇલ્ડ વૅલફેર કમિટીના સભ્ય બિપીન ચેમ્બથકારાએ બીબીસીને જણાવ્યું કે મેપ્પડીમાં ચાના બગીચાઓમાં કેટલા લોકો રહેતા હતા એ અંગે તેમને કોઈ માહિતી નથી. અહીં બીજાં રાજ્યોમાં આવેલા લોકો મોટા પ્રમાણમાં કામ કરે છે. તેમના જણાવ્યા અનુસાર આ દુર્ઘટનામાં પ્રવાસીઓ પણ પ્રભાવિત થયા છે.