મણિપુરમાં હિંસા: કેમ્પ પર હુમલો, ફાયરિંગમાં બેના મોત, બે ઘાયલ

manipur news

 મણિપુરના કાંગપોકપી જિલ્લામાં મંગળવારે એક કેમ્પ પર અજાણ્યા બંદૂકધારીઓએ હુમલો કરતાં ઓછામાં ઓછા બે ગ્રામીણ સ્વયંસેવકો માર્યા ગયા અને બે ઘાયલ થયા. પોલીસે આ માહિતી આપી હતી. આ ઘટના ઇમ્ફાલ પશ્ચિમ જિલ્લાને અડીને આવેલા લમશાંગ વિસ્તારમાં કડાંગબંદ ગામ નજીક સ્થિત કેમ્પમાં બની હતી.  એક પોલીસ અધિકારીએ જણાવ્યું હતું કે, "કેટલાક અજાણ્યા બંદૂકધારીઓના હુમલા પછી, ગામના સ્વયંસેવકોએ વળતો જવાબ આપ્યો, જેના પરિણામે ગામના બે સ્વયંસેવકોના મોત થયા જ્યારે બે ઘાયલ થયા. જવાબી કાર્યવાહી પછી, પીછેહઠ કરી રહેલા હુમલાખોરો ફરી એકઠા થયા અને ફરીથી હુમલો કર્યો. ગોળીબાર ચાલુ છે."

તેમણે કહ્યું કે ગોળીબાર શરૂ થયા બાદ કડાંગબંદ અને પડોશી કૌત્રુક ગામોની ઘણી મહિલાઓ, બાળકો અને વૃદ્ધ લોકો સુરક્ષિત વિસ્તારો તરફ ભાગી ગયા હતા. અધિકારીએ જણાવ્યું કે પરિસ્થિતિને કાબૂમાં લેવા માટે વધારાના સુરક્ષા કર્મચારીઓને વિસ્તારમાં મોકલવામાં આવ્યા છે. ઘાયલ વ્યક્તિને ઈમ્ફાલ રિજનલ ઈન્સ્ટિટ્યૂટ ઓફ મેડિકલ સાયન્સમાં લઈ જવામાં આવ્યો છે. 

કૌત્રુક અને કદાંગબંદ ગામ ચાલી રહેલ જાતીય હિંસાથી ખરાબ રીતે પ્રભાવિત થયા છે, સશસ્ત્ર જૂથો વચ્ચે અનેકવાર ગોળીબાર થયો છે. ગયા વર્ષે મે મહિનામાં રાજ્યમાં જાતિય હિંસા ફાટી નીકળી ત્યારથી અત્યાર સુધીમાં 180 થી વધુ લોકો માર્યા ગયા છે.