ગુજરાતના માથેથી 'મહા' વાવાઝોડાની ઘાટ તો ટળી ગઇ છે, પરંતુ વાવાઝોડાને કારણે આગામી મંગળવારથી ગુરુવાર સુધીમાં સમગ્ર દક્ષિણ ગુજરાતમાં ભારે વરસાદ પડી શકે છે. હવામાન વિભાગની આગાહી પ્રમાણે આગામી 6 અને 7 તારીખે વરસાદ પડે તેવી શક્યતા છે. 100થી 110ની સ્પીડે પવન ફૂંકાશે. સિવિયર સાયક્લોનિક સ્ટોર્મ વેરાવળથી 550 કિમી દૂર છે. જે 4 તારીખ પછી મૂવમેન્ટ બદલશે અને 6 તારીખે મધરાત્રે દરિયા કાંઠે હીટ કરશે. વાવાઝોડું ગુજરાતના દરિયાકિનારા સુધી પહોંચે તે પહેલાં નબળું પડી જશે તેવી હવામાન વિભાગે આગાહી વ્યક્ત કરી છે.
જોકે, આ વાવાઝોડાની અસરને કારણે રવિવારે તાપી જિલ્લાના વ્યારામાં સવા ઇંચ વરસાદ ખાબક્યો હતો. આ સિવાય સુરત, નવસારી, વલસાડ જિલ્લામાં વરસાદ નોંધાયો નથી. જોકે, કમોસમી વરસાદને કારણે ડાંગર સહિતના પાકને નુકસાન થતાં જગતનો તાત ચિંતિત જોવા મળી રહ્યો છે.