૧૪ સરકાર પ્રજા માટે છે. સમાજના છેવાડાના લોકોનું ભલુ કરવુ એ આ સરકારની પ્રાથમિકતા છે. આથી જનહિતના કાર્યોમાં બેદરકારી રાખનાર અધિકારીઓ સામે કાર્યવાહી થશે તેમ વાહન વ્યવહાર અને જૂનાગઢ જિલ્લાો પ્રભારી મંત્રી અરવિંદ રૈયાણીએ જણાવ્યું હતું.
જૂનાગઢ કલેક્ટર કચેરી ખાતે જિલ્લાના પદાધિકારીઓ અને ત્યારબાદ અધિકારીઓ સાથે બેઠક યોજી પ્રભારીમંત્રીએ કહ્યું કે, રસ્તાના નબળા કામ કરનાર એજન્સીઓ સામે કાર્યવાહી કરો અને આવી એજન્સીઓને બીજી વાર કામ ના મળે તેવી વ્યવસ્થા ઉભી કરો. સરકારી જમીનમાં દબાણ શું કામ થાય ? દબાણ થઇ જાય પછી દુર કરવા કાર્યવાહી કરવી એના કરતા દબાણ ન થાય તેવી વ્યવસ્થા ઉભી કરવા તેમણે સ્પષ્ટ તાકીદ કરી હતી.
પી.જી.વી.સી.એલ. દ્વારા એક જ સર્વે નંબરમાં ખેડુત વીજ કનેકશન શીફ્ટ કરવા માંગે તો તેને મંજુરી આપવી. સરકારની કચેરીમાં આવતા લોકો સાથેનો વ્યવહાર બદલો, લોકો તેમનાં કામ માટે આવે છે. તેને સારો જવાબ મળવો જોઇએ. સીવીલ હોસ્પીટલમાં સફાઇમાં તકેદારી રાખવા સાથે જૂનાગઢ શહેર અને અન્ય શહેરોમાં રખડતા પશુઓની સમસ્યાનો નીવેડો લાવવા જિલ્લા પ્રભારી મંત્રીએ અધિકારીઓને સ્પષ્ટ સુચનાઓ આપી હતી.
પ્રભારી મંત્રીએ ભારપુર્વક કહ્યુ કે અધીકારીઓને સરકારે આપેલ સત્તાનો ઉપયોગ જનહિત માટે કરવાનો છે. લોકોનાં પ્રશ્નો ઉકેલવાના છે. એક બીજાને ખો આપવાની વૃત્તિ ત્યજવા તેમણે સ્પષ્ટપણે જણાવ્યુ હતુ.