ગુજરાતમાં અવકાશ યાત્રી સનીતા વિલિયમ્સના ગામમાં મંદિરમાં હિંદુઓ મુસ્લિમ દેવીની પૂજા કરે છે. અમદાવાદથી 40 કિલોમીટર દૂર આવેલા ‘ઝૂલાસણ’ નામનું ગામ આવેલું છે. આ ગામમાં એક ડોલા માતાનું મંદિર છે. જેમાં એક મુસ્લિમ મહિલાની પુજા કરવામાં આવે છે. ખુબ જ આસ્થા અને શ્રદ્ધા સાથે મોટી સંખ્યામાં હિંદુ ભક્તો આ મુસ્લિમ દેવીના આશિર્વાદ લેવા માટે આવે છે.
આ મંદિરને લઈને એવી વાયકા છે કે 250 વર્ષ પહેલા એક ડોલા નામની બહાદુર મુસ્લિમ મહિલા હતી. એક વખત ગામ પર ડાકુઓનો હુમલો થયો તો આ મહિલાએ બહાદુરીથી તેમનો સામનો કર્યો અને ગ્રામજનોની રક્ષા કરી હતી. તેમની સામે લડતા લડતા મુસ્લિમ મહિલાએ પોતાનો જીવ આપી દીધો હતો. આ મહિલાની યાદમાં ગ્રામજનોએ અહીં એક મંદિરનું નિર્માણ કરાવ્યું છે. ત્યાર બાદ અહીં ડોલા માતાની પૂજા કરવામાં આવી રહી છે. જોકે આ મંદિરમાં કોઈ મૂર્તિ નથી પરંતુ એક પથ્થરનું યંત્ર છે. જેની ઉપર સાડી ચઢાવીને પૂજા કરવામાં આવે છે. એવી પણ આસ્થા છે કે ડોલામાતાની માનતા રાખવાથી તમામ ઈચ્છાઓ પૂરી થાય છે. આ ઉપરાંત ઝૂલાસણ ગામની એક મોટી ઓળખ એ પણ છે કે અંતરિક્ષ યાત્રી સુનીતા વિલિયમ્સના પિતાજીના પૂર્વજોનું આ ગામ છે. જ્યારે સુનીતા વિલિયમ્સ અંતરિક્ષ યાત્રા પર ગઈ હતી ત્યારે તેની યાત્રા પરથી સુકુશળ પરત ફરે તે માટે અખંડ જ્યોત પ્રગટાવવામાં આવી હતી. આ મંદિર ‘ડોલર માતા’ તરીકે પણ જાણીતું છે કારણ કે 7 હજારની વસ્તીમાંથી 1500 લોકો અમેરિકામાં સેટલ્ થયા છે. એટલા માટે અમેરિકા જવા ઈચ્છતા લોકોને વિઝા જલદી મળી અમેરિકા પહોંચે તે માટે અહીં પ્રાર્થના કરી માનતા રાખે છે.