રાજકોટ સહિત સૌરાષ્ટ્રમાં મારામારી, જમીન અને હથિયારના કેસોમાં અનેકવખત પકડાયેલી લેડી ડોન સોનુ ડાંગરને ક્રાઇમ બ્રાન્ચે 1 પિસ્તોલ અને 18 કારતૂસ સાથે ઝડપી પાડી છે. આ પિસ્તોલ અને કારતૂસ ક્યાંથી મેળવ્યા હતા તે અંગે પોલીસે તપાસ હાથ ધરી છે. રાજકોટ શહેર પોલીસ કમિશનર અનુપમસિંહ ગેહલોતના માર્ગદર્શન હેઠળ ક્રાઇમ બ્રાન્ચે સોનુ ડાંગરને તેના ઘર પાસેથી જ દેશી બનાવટની પિસ્તોલ અને 18 નંગ કારતૂસ સાથે ઝડપી પાડી હતી
પોલીસે 1 પિસ્તોલ, 18 નંગ કારતૂસ અને મોબાઇસ સહિત 16800ના મુદ્દામાલ સાથે પકડી પાડી હતી. પોલીસે હથિયાર ક્યાંથી મેળવ્યા હતા તે અંગે પોલીસે તપાસ હાથ ધરી છે. સોનુ ઉર્ફે ઉષા ચંદુભાઇ ડાંગરે મુગ્ધાવસ્થા દરમિયાન બુટલેગર સંજય રાજપૂત સાથે લગ્ન કર્યા બાદ ગુનાખોરીની દુનિયામાં પ્રવેશ કર્યો હતો. દિયર ઉપર ખૂની હુમલો, પતિ સાથે ગાંધીગ્રામના કિરણ ઉર્ફે કાબરાની હત્યા, મારામારી અને છરીથી હુમલા સતત અનેક ગુનામાં સોનુ પોલીસ ચોપડે ચડી ચૂકી છે. ટ્રાફિક પોલીસની ફરજમાં રૂકાવટ, ખંડણી-પ્રોટેક્શન મની માટે બિલ્ડરને ધમકી આપીને સાઇટ ઉપર તોડફોડ કરવાના ગુનામાં પકડાયા બાદ તે જૂનાગઢમાંથી બે રિવોલ્વર, પિસ્તોલ સાથે ઝડપાઇ હતી. આ સિવાય શહેરમાં ચકચારી દારૂ અને બીયર પ્રકરણમાં પકડાયેલી કુખ્યાત કોલેજીયન ગર્લની સોનુ ડાંગર સાથેની ઓડીયો ક્લિપ વાયરલ થઈ હતી.