અમદાવાદમાં કોરોના વોરિયર્સનો પીવાના પાણી માટે જંગ

અમદાવાદના સોલા ખાતે આવેલી જીએમઇઆરએસ હૉસ્પિટલમાં કામ કરતાં અને મેડિકલ કૉલેજની હૉસ્ટેલમાં રહેતાં રેસિડેન્ટ ડૉક્ટરોને પીવાલાયક ચોખ્ખું પાણી મળી રહ્યું નથી.

અમદાવાદ મિરરના અહેવાલ અનુસાર વિદ્યાર્થીઓએ પીવાનું પાણી દરરોજ બહારથી ખરીદવું પડે છે.

ભવદીપ ખિમાણી નામના વિદ્યાર્થીએ કહ્યું કે અમે છેલ્લાં ત્રણ વર્ષથી અહીં રહીએ છીએ. પાણીનો કોઈ સ્વાદ હોતો નથી પરંતુ આ પાણીમાં ગંદો સ્વાદ આવે છે. અમે બીમાર ન પડીએ તેથી બહારથી પાણી મંગાવીએ છીએ.

એક વિદ્યાર્થીએ નામ ન આપવાની શરતે કહ્યું, "આ પ્રશ્ન છેલ્લાં એક વર્ષથી ચાલી રહ્યો છે. અમારા સિનિયરોએ પણ ફરિયાદ કરી હતી કે ખારું પાણી આવે છે. જેના કારણે અનેક વિદ્યાર્થીઓને કિડનીમાં પથરી થઈ હતી. આ કારણે વિદ્યાર્થીઓ ખાનગી સપ્લાયર્સ પાસેથી પૈસા ખર્ચી પાણી મંગાવે છે."

કૉલેજના ડીને કહ્યું કે અમે અમારા પ્રોજેક્ટ ઇમ્પ્લિમેન્ટેશન વિભાગને આની જાણ કરી છે કે તાત્કાલિક ધોરણે તૂટી પડેલા વૉટર કૂલર અને વૉટર પ્યૉરિફાયરને સાફ કરી રિપેર કરી દેવામાં આવે.