SRH vs RR Highlights : હૈદરાબાદે છેલ્લા બોલ પર મેળવી જીત, રોમાંચક મેચમાં રાજસ્થાનને એક રનથી હરાવ્યું.

Sunrisers Hyderabad

SRH vs RR Indian Premier League 2024 : રાજસ્થાન રોયલ્સ, જે ટેબલમાં ટોચ પર છે, તેનો સામનો IPL ઇતિહાસમાં સૌથી વધુ રન બનાવનાર સનરાઇઝર્સ હૈદરાબાદ સામે થયો હતો. બંને ટીમો વચ્ચેની આ મેચ રાજીવ ગાંધી ઈન્ટરનેશનલ સ્ટેડિયમમાં રમાઈ હતી. હૈદરાબાદ માટે ભુવનેશ્વર કુમારે શાનદાર પ્રદર્શન કર્યું, જેના આધારે ટીમ બે પોઈન્ટ મેળવવામાં સફળ રહી, જ્યારે પ્લેઓફમાં પહોંચવા માટે રાજસ્થાનને થોડી રાહ જોવી પડશે  

સનરાઇઝર્સ હૈદરાબાદે પ્રથમ બેટિંગ કરતા 201 રન બનાવ્યા હતા. જવાબમાં રાજસ્થાન રોયલ્સ ટાર્ગેટનો પીછો કરતા માત્ર 200 રન જ બનાવી શકી હતી. છેલ્લા બોલ પર રાજસ્થાન રોયલ્સને જીતવા માટે બે રનની જરૂર હતી. ત્યારબાદ રોવમેન પોવેલ ક્રિઝ પર હતો અને ભુવનેશ્વર કુમારે બોલિંગની જવાબદારી સંભાળી હતી. તેણે છેલ્લા બોલ પર પોવેલને આઉટ કર્યો હતો. આ રીતે હૈદરાબાદની ટીમ મેચ જીતવામાં સફળ રહી હતી. લક્ષ્યનો પીછો કરતી વખતે IPL 2024માં રાજસ્થાન રોયલ્સની આ પ્રથમ હાર છે.

છેલ્લી ઓવરમાં મેચ જીતી

રાજસ્થાન રોયલ્સની શરૂઆત ખૂબ જ ખરાબ રહી હતી. જ્યારે ટીમે પહેલી જ ઓવરમાં બે વિકેટ ગુમાવી દીધી હતી. કેપ્ટન સંજુ સેમસન અને વિસ્ફોટક ઓપનર જોસ બટલર પોતાનું ખાતું પણ ખોલાવી શક્યા ન હતા. પરંતુ આ પછી યશસ્વી જયસ્વાલ અને રિયાન પરાગે શાનદાર બેટિંગ કરી હતી. આ બંને ખેલાડીઓએ 134 રનની ભાગીદારી કરી હતી. પરંતુ જયસ્વાલના આઉટ થયા બાદ રાજસ્થાનની બેટિંગ વિખેરાઈ ગઈ હતી. તેણે 67 રન બનાવ્યા હતા. પરાગે 77 રનનું યોગદાન આપ્યું હતું. શિમરોન હેટમાયર કંઈ ખાસ બતાવી શક્યો નહોતો. તેણે 13 રન બનાવ્યા હતા. રોવમેન પોવેલે 27 રન બનાવ્યા હતા. સનરાઇઝર્સ હૈદરાબાદ તરફથી ભુવનેશ્વર કુમારે સૌથી વધુ ત્રણ વિકેટ લીધી હતી. તેને પ્લેયર ઓફ ધ મેચનો એવોર્ડ આપવામાં આવ્યો હતો. પેટ કમિન્સ અને ટી નટરાજને બે-બે વિકેટ લીધી હતી.

હૈદરાબાદની શરૂઆત ધીમી રહી હતી

સનરાઇઝર્સ હૈદરાબાદની શરૂઆત ધીમી રહી હતી અને પાવરપ્લેમાં યજમાન ટીમ બે વિકેટે 37 રન જ બનાવી શકી હતી. હેડે મેચના પ્રથમ બોલ પર ચોગ્ગા સાથે ટ્રેન્ટ બોલ્ટનું ખાતું ખોલાવ્યું હતું જ્યારે અભિષેક શર્મા (12)એ રવિચંદ્રન અશ્વિનનું સ્વાગત સિક્સર સાથે કર્યું.અનમોલપ્રીત સિંઘે (05) આવતાની સાથે જ અવેશ પર ચોગ્ગો ફટકાર્યો હતો પરંતુ સંદીપ શર્માનો પહેલો જ બોલ મિડ-વિકેટ પર યશસ્વી જયસ્વાલના હાથમાં રમ્યો હતો. નીતીશે 13મી ઓવરમાં ચહલ પર બે છગ્ગા અને બે ચોગ્ગાની મદદથી ટીમના સ્કોરને 100 રનની પાર પહોંચાડ્યો હતો. હેડે સંદીપની બોલ પર 39 બોલમાં પોતાની અડધી સદી પૂરી કરી હતી.