હરિયાણામાં આજે વિધાનસભાની ચૂંટણી માટે મતદાન શરૂ થઈ ગયું છે. રાજ્યમાં આ વખતની વિધાનસભા ચૂંટણી મહત્ત્વની એટલા માટે છે કે છેલ્લી બે ટર્મથી સત્તામાં રહેલી ભારતીય જનતા પાર્ટી જો જીતે તો ત્રીજી વખત સત્તામાં આવશે. બીજી બાજુ કૉંગ્રેસ પાર્ટી દાવો કરી રહી છે કે રાજ્યમાં તે ફરીથી સત્તામાં આવી રહી છે. મતગણતરી આઠમી ઑક્ટોબરના રોજ હાથ ધરવામાં આવશે.
હરિયાણા વિધાનસભાની 90 બેઠક માટે ભાજપ, કૉંગ્રેસ, જનનાયક જનતા પાર્ટી, આમ આદમી પાર્ટી તથા ઇન્ડિયન નૅશનલ લોકદળ અને બહુજન સમાજ પાર્ટીના ગંઠબંધન વચ્ચે મુકાબલો થશે. ભાજપ રાજ્યના મુખ્ય મંત્રી નાયબ સૈનીના ચહેરા પર ચૂંટણી લડી રહ્યો છે જ્યારે કૉંગ્રેસે હજુ સુધી મુખ્ય મંત્રી તરીકે કોઈ નામની જાહેરાત કરી નથી. વિધાનસભા ચૂંટણી માટે ઇન્ડિયન નૅશનલ લોકદળ અને બહુજન સમાજ પાર્ટીએ ગંઠબંધન કર્યું છે. ગઠબંધને જાહેર કર્યું છે કે જો તે જીતશે તો અભયસિંહ ચૌટાલા મુખ્ય મંત્રી બનશે. જાટ મતદાર, મહિલા કુસ્તી ખેલાડીઓ પ્રત્યે સહાનુભૂતિ તથા ખેડૂત આંદોલન જેવા મુદ્દા આગામી હરિયાણાની વિધાનસભાની ચૂંટણીમાં ભૂમિકા ભજવી શકે છે.
2019ની લોકસભા ચૂંટણી સમયે ભાજપને તમામ 10 બેઠક મળી હતી, જ્યારે આ વખતે ભાજપને માત્ર પાંચ બેઠક જ મળી હતી.લોકસભાનાં ચૂંટણી પરિણામ પછી ભાજપ બંને રાજ્યોની ચૂંટણીમાં ઉત્કૃષ્ટ પ્રદર્શન કરવા આતુર હશે, જ્યારે ઇન્ડિયા ગઠબંધન સારું પ્રદર્શન કરીને ભાજપને પાછળ ધકેલવા ઇચ્છશે.
હરિયાણા વિધાનસભા ચૂંટણી માટે મતદાન ચાલુ છે. ચૂંટણી પંચના જણાવ્યા અનુસાર સવારે 9 વાગ્યા સુધી 9.53 ટકા મતદાન નોંધાયું હતું.
10:20 AM, 5th Oct
- કોંગ્રેસ તોશામથી જીતશે – અનિરુદ્ધ ચૌધરી
ભિવાની: તોશામના કોંગ્રેસના ઉમેદવાર અનિરુદ્ધ ચૌધરીએ કહ્યું, "...અહીં ખૂબ જ સારું વાતાવરણ છે, કોંગ્રેસ પાર્ટીની સરકાર આવી રહી છે. લોકોએ કોંગ્રેસ પાર્ટીને જીતાડવાનું મન બનાવી લીધું છે. કોંગ્રેસ પાર્ટીની સરકાર બનવા જઈ રહી છે. રચાશે અને તોશામ કોંગ્રેસ જીતશે."