મુખ્યમંત્રી આનંદીબહેન પટેલની ગઇકાલે અમદાવાદ ખાતેની બ્રિટિશ ડેપ્યુટી હાઈકમિશનની કચેરીના નવનિયુક્ત ડેપ્યુટી હાઈકમિશનર જ્યોફ વેઈનએ સૌજન્ય મુલાકાત લીધી હતી. મુખ્યમંત્રીએ અમદાવાદમાં આ કચેરી કાર્યરત કરવા માટે બ્રિટન સરકારનો આભાર વ્યક્ત કરતાં જણાવ્યું કે, બ્રિટનમાં વસવાટ કરતાં ૬ લાખ ગુજરાતીઓને આ કચેરી સહાયક બનશે. બ્રિટન વિઝા મેળવવા માટે માર્ગદર્શન તથા માહિતી તેમજ પ્રવાસન અંગે પણ આ નવી કચેરી મદદરૂપ થશે.
જ્યોફ અને મુખ્યમંત્રીએ પરસ્પર પરામર્શમાં એવો સૂર વ્યક્ત કર્યો હતો કે ગુજરાત બ્રિટન વચ્ચે આપસી સંબંધોનો સેતુ આ નવીન કચેરી વધુ સુદૃઢ બનાવશે.અત્રે એ નિર્દેશ કરવો જરૃરી છે કે, તાજેતરમાં જ વાયબ્રન્ટ ગ્લોબલ સમિટ-૨૦૧૫માં યુકેના મંત્રી લોર્ડ લિવિંગ્સ્ટને ગુજરાતમાં બ્રિટિશ ડેપ્યુટી હાઈકમિશનની કચેરી શરૂ કરવા કરેલી જાહેરાતને પગલે આ નવીન કચેરી અમદાવાદમાં શરૂ થઈ છે. બ્રિટિશ ડેપ્યુટી હાઈ કમિશનની અન્ય કચેરીઓ મુંબઈ, ચેન્નાઈ, કલકત્તા અને ગોવામાં હાલ કાર્યરત છે.