15 લાખ ભરીને સર્ટીફિકેટ લઈ જાઓ, પ્રવેશ રદ નહીં થાય- ભાવનગર મેડિકલ કોલેજ

ગતીશિલ ગુજરાતમાં શિક્ષણમાં થઈ રહેલા અન્યાયનું એક વરવુ ઉદાહરણ પ્રકાશમાં આવ્યું છે. વિકાસની વાતો કરતી સરકારને માત્ર લોકોના ખીસા કેવી રીતે ખાલી કરવા તેમાં જ જાણે રસ હોય તેમ જાહેરમાં લોકો પાસે રૂપિયા માંગવાની આદત જાણે જતી જ નથી. રૂપાણીના રાજમાં રૂપાળું ગુજરાત કેવી રીતે બની શકે એ હવે એક સવાલ થઈ ગયો છે. ઘટના પ્રમાણે જોઈએ તો ભાવનગરના એક વિદ્યાર્થીને ડેન્ટલ મેડિકલમાં પ્રવેશ લઈ લીધા બાદ માનસિક અસ્વસ્થતાને કારણે અભ્યાસ છોડી દેવો હોવા છતાં કોલેજ દ્વારા તેના પ્રમાણપત્રો પરત નહિ આપીને રૂા.15 લાખની 5 વર્ષ સુધીની ફી માંગવામાં આવતી હોવાનો લેખિત આક્ષેપ અને રજૂઆત વાલી દ્વારા કરવામાં આવી છે. વિદ્યાર્થીના વાલી મુકેશ ચંદ્રકાંતભાઈ વાઘેલા  દ્વારા આ ફરિયાદ ગુજરાત યુનિવર્સિટી, શિક્ષણમંત્રી, રાજ્યપાલ સહિત ઉચ્ચકક્ષાએ કરાઈ છે. જેમાં જણાવાયું છે કે, ધાર્મિકે અહમદાબાદ ડેન્ટલ કોલેજ, સાંતેજ, રણછોડપુરામાં એડમિશન લીધા બાદ હવે તેની માનસિક હાલત કથળી છે. પરિણામે આગળ અભ્યાસ નહિ કરવા તા.13-10ના રોજ એડમિશન કમિટીના ચેરમેન અને બી.જે. મેડિકલ કોલેજ-અમદાવાદના ડીન ભરતભાઈ શાહ તેમજ કોલેજના ટ્રસ્ટી દક્ષેશભાઈ શાહ સહિતનાને રૂબરૂ વિનંતી કરી હતી. પરંતુ એડમિશન રદ નહિ થઈ શકે તેવું ચોખ્ખા શબ્દોમાં સંભળાવી દીધું હતું અને કહેવામાં આવ્યું કે, તમારા બાળકને ફરજિયાત ડેન્ટલમાં જ ભણાવવો પડશે અને જો ન ભણાવવો હોય તો 5 વર્ષની ફી રૂા.15 લાખ ભરો પછી જ તમારો પ્રવેશ રદ થશે. તમને કોઈપણ પ્રકારની મદદ મળશે નહિ. રિશફલીંગની હવે કોઈ પ્રક્રિયા ન થતી હોવાથી અમે કોઈ વિદ્યાર્થીનું એડમિશન રદ કરીએ તો તે જગ્યા ખાલી રહે છે. પરિણામે કોલેજને આર્થિક નુકસાની વેઠવી પડે છે. છતાં અમને રજૂઆત થાય ત્યારે મેડિકલ ડેન્ટલ પ્રવેશના ચેરમેન ભરતભાઈ શાહનો સંપર્ક કરાવીએ છીએ. અમે એડમિશન આપતા પહેલા જ વાલીઓને સ્પષ્ટતા કરીએ છીએ.