મહિલાઓના ઉત્થાન માટે ૧૦૦૦ કરોડની મુડીથી શરૃ કરવામાં આવેલી ભારત સરકારની સંપુર્ણ માલીકીની ભારતીય મહિલા બેંક સરકાર બદલાય જતાં અવગણનાનો સામનો કરી રહી છે. યુપીએ સરકારે પોતાના અંતિમ બજેટમાં આ બેંકની જાહેરાત કરી હતી અને બહુ ઉતાવળે ભુતપુર્વ વડાપ્રધાન ઈન્દિરા ગાંધીના જન્મદિવસે દેશભરમાં ૪૦ શાખાઓ ખોલવામાં આવી હતી. જો કે બાદમાં કેન્દ્રમાં સરકાર બદલાય જતાં અત્યારે નાણાં મંત્રાલયમાં આ બેંકનો કોઈ ભાવ પુછતું નથી. આ બેંકની સી જી રોડ પર આવેલી એક માત્ર શાખામાં દોઢ વર્ષમાં છ હજાર થાપણદારોના ખાતા ખુલ્યા છે જેમાંથી પાંચ હજાર જનધન યોજના હેઠળ ખુલ્યા છે. બીજી તરફ અત્યાર સુધીમાં માત્ર ૬૭ મહિલાઓને આ બેંકે ધિરાણ આપ્યું છે જે બ્યુટીપાર્લર જેવી પ્રવૃતિઓ માટે અપાયું છે.
આ બેંકનો હેતુ ગ્રામીણ અને શહેરી મહિલાઓને સરળતાથી પોતાના ધંધા-ઉદ્યોગ માટે ધિરાણ આપવાનો છે. સપ્ટેમ્બર ૨૦૧૩માં શરૃ થયેલી આ બેંકની શાખા અમદાવાદમાં સી.જી. રોડ પર છે જે સંપુર્ણ કોમર્શીયલ વિસ્તાર છે જયાં આસપાસ કોઈ આર્થિક વિકાસથી વંચિત મહિલાઓ નથી. આ બેંક કેટલીંક સામાજિક સંસ્થાઓ અને સેલ્ફ હેલ્પ ગુ્રપની મહિલાઓ પાસેથી ૫૦-૧૦૦ રૃપિયાના રિકરીંગ ડિપોઝીટના ખાતાઓ ખોલાવે છે. આ બેંકમાં એક-બે સિનિયરને બાદ કરતાં મોટાભાગનો સ્ટાફ પણ અન્ય રાષ્ટ્રીયકૃત બેંકમાંથી ડેપ્યુટેશન પર થોડા સમય માટે આવે છે.
આ બેંકનું એક માત્ર એટીએમ બેંકની શાખાની અંદર જ છે. બેંકની ગુજરાતમાં બીજી શાખા વડોદરામાં છે પરંતુ અમદાવાદમાં બીજી કોઈ શાખાનું આયોજન નથી. આ બેંકના થાપણદારોને અન્ય બેંકમાં ભેળવીને આ બેંક બંધ કરી દેવાશે કે ચાલુ રખાશે તે અંગે કર્મચારીઓમાં આશંકા સેવાઈ રહી છે.