ગુજરાતમાં ઇલેક્ટ્રિક કાર બનાવવા માટે સુઝુકી, ટોયોટો વચ્ચે વાતચીત શરૂ

આજકાલ શહેરોમાં ઇલેક્ટ્રિક કારની લોકપ્રિયતા વધુ છે. તેનું સૌથી મોટું કારણ એ છે કે તે ઘોંઘાટ વિનાનું છે અને સાથે જ તે પ્રદૂષણ પણ થતું નથી. હવે કાર નિર્માતા સુઝુકી મોટર ટૂંક સમયમાં ગુજરાતના લોકો માટે પણ ઈલેક્ટ્રિક કારનું ઉત્પાદન કરી શકે છે. મારુતિ સુઝુકીના ટોચના અધિકારીએ જણાવ્યું હતું કે જાપાની કાર નિર્માતા સુઝુકી મોટરની ગુજરાત બ્રાંચનો ઉપયોગ મારુતિ અને ટોયોટા બંને માટે ઇલેક્ટ્રિક કાર બનાવવા માટે થઈ શકે છે.

સુઝુકી, જે મારુતિ સુઝુકીની મૂળ કંપની છે, તેને સરકારની પ્રોડક્શન-લિંક્ડ ઇન્સેન્ટિવ (PLI) યોજના હેઠળ લાભ માટે પસંદ કરવામાં આવી છે. મારુતિના MD અને CEO કેનિચી આયુકાવાના જણાવ્યા અનુસાર, ગુજરાતમાં ટોયોટા કારના ઉત્પાદનની શક્યતાઓ પર, “અમારે તેમની સાથે ચર્ચા કરવી પડશે. સુઝુકી જાપાન હજુ પણ આ અંગે ચર્ચા કરી રહ્યું છે. હજુ સુધી અમને કોઈ અંતિમ પરિણામ મળ્યું નથી. પરંતુ વાત ચાલુ છે." આયુકાવાએ જણાવ્યું હતું કે ટોયોટા જાપાને ઇલેક્ટ્રિક કાર માટે વૈશ્વિક યોજનાની જાહેરાત કરી છે, પરંતુ તે હજુ સુઝુકીની ગુજરાત શાખામાં આવશે કે કેમ તેની ખાતરી નથી.

તમને જણાવી દઈએ કે ટોયોટા અને સુઝુકી પહેલાથી જ બિઝનેસ એલાયન્સ તેમજ પ્રોડક્ટ ડેવલપમેન્ટ અને મોડલ શેરિંગમાં સાથે કામ કરી રહ્યા છે. સુઝુકી દ્વારા જર્મન ફોક્સવેગન ગ્રૂપ સાથે જોડાણ તોડ્યા બાદ આ બંને કંપનીઓએ વર્ષ 2018માં કરાર પર હસ્તાક્ષર કર્યા હતા. ભાગીદારીમાં, મારુતિએ ટોયોટા સાથે બલેનો હેચ (ગ્લાન્ઝા બેજિંગ હેઠળ), બ્રેઝા મીની એસયુવી (જેને અર્બન ક્રુઝર કહેવાય છે) જેવા ઉત્પાદનોનું ઉત્પાદન કરવા માટે ભાગીદારી કરી છે. આ મારુતિ અને સુઝુકીની ફેક્ટરીઓમાં ઉત્પાદિત થાય છે અને પછી બાહ્ય અને આંતરિક શૈલીમાં કેટલાક ફેરફારો સાથે ટોયોટાને વેચવામાં આવે છે.