લાઈફ ઈન્સ્યોરન્સ કોર્પોરેશન ઓફ ઈન્ડિયા (LIC) એ તેના રૂ. 21,000 કરોડની પ્રારંભિક જાહેર ઓફર (IPO) માટે શેર દીઠ રૂ. 902-949ની પ્રાઇસ બેન્ડ નક્કી કરી છે. IPOમાં પોલિસીધારકોને 60 રૂપિયાનું ડિસ્કાઉન્ટ મળશે અને રિટેલ રોકાણકારો અને કર્મચારીઓને 45 રૂપિયાનું ડિસ્કાઉન્ટ મળશે. કેટલાક મીડિયા રિપોર્ટ્સમાં આ દાવો કરવામાં આવ્યો છે.
રિપોર્ટમાં કહેવામાં આવ્યું છે કે IPO 2 મેના રોજ એન્કર રોકાણકારો માટે અને બાકીના માટે 4 થી 9 મે સુધી ખુલશે. ઇશ્યૂના 10% (2.21 કરોડ શેર) પોલિસીધારકો માટે અને 0.15 કરોડ શેર પાત્ર કર્મચારીઓ માટે આરક્ષિત છે. સરકાર LICમાં 3.5% હિસ્સો (22 કરોડ શેર) વેચીને આશરે રૂ. 21,000 કરોડ એકત્ર કરવા માંગે છે.
LIC 27 એપ્રિલે RHP ફાઇલ કરશે
મીડિયા અહેવાલો અનુસાર, 25 એપ્રિલે સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) એ અપડેટેડ ડ્રાફ્ટ રેડ હેરિંગ પ્રોસ્પેક્ટસને મંજૂરી આપી હતી, જેમાં હિસ્સો વેચવાની વિગતો 5% ને બદલે 3.5% હતી. હવે રેડ હેરિંગ પ્રોસ્પેક્ટસ 27 એપ્રિલ સુધીમાં સબમિટ કરવામાં આવશે.
6 શહેરોમાં રોડ શો
બીજી તરફ, LIC મેનેજમેન્ટ અને ઇન્વેસ્ટમેન્ટ બેન્કર્સ મુંબઈ, નવી દિલ્હી, બેંગલુરુ, અમદાવાદ, રાજકોટ, કોલકાતામાં રોડ શો કરશે, જ્યાં તેઓ બુધવારથી સંભવિત રોકાણકારો અને વિશ્લેષકોને મળશે. આ રોડ શો આ સપ્તાહના અંત સુધી ચાલુ રહેશે. આ ઉપરાંત ઓનલાઈન રોડ શો પણ ચાલુ રહેશે.
માર્ચ 2022 સુધીમાં IPO લોન્ચ કરવાની યોજના હતી
સરકારની યોજના માર્ચ 2022 સુધીમાં IPO લાવવાની હતી, પરંતુ રશિયા-યુક્રેન યુદ્ધને કારણે બજારનું સેન્ટિમેન્ટ નેગેટિવ થઈ ગયું અને સરકાર વેઈટ એન્ડ વોચ મોડમાં ગઈ. હવે જ્યારે બજાર ફરી સુધર્યું અને સેન્ટિમેન્ટ અમુક અંશે સકારાત્મક બન્યું, ત્યારે સરકારે ફરીથી IPO લાવવાની તૈયારી શરૂ કરી.
આ મહિનાની શરૂઆતમાં, સરકારે LICમાં 20% વિદેશી સીધા રોકાણ (FDI)ને મંજૂરી આપવા માટે FDI નિયમોમાં પણ સુધારો કર્યો હતો.
સૌથી મોટો IPO હશે
LICનો ઇશ્યૂ ભારતીય શેરબજારમાં અત્યાર સુધીનો સૌથી મોટો IPO હશે. સરકાર LICમાં 3.5% હિસ્સો વેચીને 21,000 કરોડ રૂપિયા એકત્ર કરી શકે છે. લિસ્ટિંગ બાદ LICનું માર્કેટ વેલ્યુએશન ટોચની કંપનીઓને સ્પર્ધા આપશે. આ પહેલા પેટીએમનો ઈશ્યુ સૌથી મોટો હતો અને કંપનીએ ગયા વર્ષે આઈપીઓથી 18,300 કરોડ રૂપિયા એકત્ર કર્યા હતા.