રિંકુ સિંહ IPL 2023માં સૌથી મોટા ખેલાડી તરીકે ઉભરી આવ્યો હતો. તેણે આ વર્ષની IPLમાં કેટલીક શાનદાર ઇનિંગ્સ રમી હતી અને અનેક પ્રસંગોએ KKRની ટીમની જીતમાં મહત્વની ભૂમિકા ભજવી હતી. રિંકુ સિંહે આઈપીએલમાં તેની છેલ્લી મેચમાં કંઈક આવું જ કર્યું હતું. લખનઉ સુપર જાયન્ટ્સ અને કોલકાતા નાઈટ રાઈડર્સ વચ્ચે રમાયેલી મેચમાં રિંકુ સિંહે યાદગાર ઈનિંગ રમી હતી. જો કે તે પોતાની ટીમ માટે મેચ જીતી શક્યો ન હતો, પરંતુ છેલ્લી ઓવર સુધી ચાલેલી આ મેચમાં રિંકુ સિંહે પોતાની શાનદાર બેટિંગથી બધાના દિલ જીતી લીધા હતા. આ દરમિયાન તેણે મહાન ખેલાડી અને કેપ્ટન એમએસ ધોનીનો રેકોર્ડ પણ તોડ્યો, શું છે તે ખાસ રેકોર્ડ?
IPLમાં સૌથી મહાન ફિનિશર્સની વાત કરીએ તો એમએસ ધોનીનું નામ ટોચ પર આવશે. આ યાદીમાં રિંકુ સિંહનું નામ પણ સામેલ છે. હવે તેણે એમએસ ધોનીનો એક ખાસ રેકોર્ડ પણ તોડ્યો છે. વાસ્તવમાં રિંકુ સિંહે લખનૌ સામે રમાયેલી મેચમાં 20મી ઓવરમાં 2 સિક્સ ફટકારી હતી, આ સાથે તેણે એમએસ ધોનીનો રેકોર્ડ પણ તોડી નાખ્યો હતો. આ સિઝનમાં રિંકુ સિંહે તેની 20મી ઓવરમાં 9 સિક્સ ફટકારી છે, જે સિઝનની 20મી ઓવરમાં કોઈપણ બેટ્સમેન દ્વારા ફટકારવામાં આવેલી સૌથી વધુ સિક્સ છે. આ પહેલા વર્ષ 2014 અને 2019માં એમએસ ધોનીના નામે 8 સિક્સર છે.
IPL સિઝનમાં 20મી ઓવરમાં સૌથી વધુ છગ્ગા મારનાર બેટ્સમેન
રિંકુ સિંહ - 9 સિક્સર (વર્ષ 2023)
એમએસ ધોની - 8 છગ્ગા (વર્ષ 2014, 2019)
ડ્વેન બ્રાવો - 8 સિક્સર (2012)
રોહિત શર્મા - 8 સિક્સર (વર્ષ 2013)
હાર્દિક પંડ્યા - 8 સિક્સર (વર્ષ 2019)
કેવી રહી KKR vs LSG મેચ
લખનૌ સુપર જાયન્ટ્સ અને કોલકાતા નાઈટ રાઈડર્સ વચ્ચે રમાયેલી આ મેચની વાત કરીએ તો, આ મેચમાં KKRના કેપ્ટન નીતિશ રાણાએ ટોસ જીતીને બોલિંગ કરવાનો નિર્ણય કર્યો હતો. પ્રથમ બેટિંગ કરતા લખનૌ સુપર જાયન્ટ્સે 20 ઓવરમાં 8 વિકેટ ગુમાવીને 176 રન બનાવ્યા હતા. આ દરમિયાન નિકોલસ પૂરને 30 બોલમાં 58 રનની ઇનિંગ રમી હતી. જવાબમાં KKRની ટીમ 20 ઓવરમાં 7 વિકેટ ગુમાવીને 175 રન જ બનાવી શકી અને લખનૌએ મેચ જીતી લીધી. રિંકુ સિંહે ફરી એકવાર KKR માટે 67 રનની અણનમ ઈનિંગ રમી હતી, પરંતુ તે ટીમને મેચ જીતાવી શક્યો નહોતો.