IND vs PAK મેચ દરમિયાન પાકિસ્તાની ખેલાડીની હરકત મોંઘી સાબિત થઈ, ICC એ લીધી કડક એક્શન

પાકિસ્તાન મહિલા ક્રિકેટર સિદ્રા અમીનને ભારત સામેની મહિલા ODI વર્લ્ડ કપ 2025 મેચ દરમિયાન ICC આચારસંહિતાનો ભંગ કરવા બદલ ઠપકો આપવામાં આવ્યો છે. તેણીને એક ડિમેરિટ પોઈન્ટ પણ આપવામાં આવ્યો છે. આ મામલો ICCના લેવલ 1 નિયમો હેઠળ આવે છે. આ ઘટના 5 ઓક્ટોબરના રોજ કોલંબોના આર પ્રેમદાસા સ્ટેડિયમમાં ભારત-પાકિસ્તાન મેચ દરમિયાન બની હતી. ભારતે પહેલા બેટિંગ કરીને 247 રન બનાવ્યા હતા, જેના જવાબમાં પાકિસ્તાન 159 રનમાં ઓલઆઉટ થઈ ગયું હતું અને 88 રનથી હારનો સામનો કરવો પડ્યો હતો. સિદ્રા અમીને આ મેચમાં 81 રનની શાનદાર ઇનિંગ્સ રમી હતી અને પોતાની ટીમ માટે એકલા હાથે લડી હતી.

પિચ પર બેટ મારવી પડી ગઈ ભારે 

ICC ની પ્રેસ રિલીઝ અનુસાર, સિદ્રાએ ICC આચાર સંહિતાની કલમ 2.2 નો ભંગ કર્યો છે, જે આંતરરાષ્ટ્રીય મેચ દરમિયાન ક્રિકેટ સાધનો અથવા કપડાં, ગ્રાઉન્ડ સાધનો અથવા ફિટિંગના દુરુપયોગ સાથે સંબંધિત છે. આ ઘટના 40મી ઓવરમાં બની હતી જ્યારે સ્નેહ રાણાએ સિદ્રા અમીનને આઉટ કર્યો હતો. ગુસ્સામાં, તેણીએ પોતાનું બેટ પીચ પર ફેંક્યું હતું. ICC એ જણાવ્યું હતું કે છેલ્લા 24 મહિનામાં આ તેણીનો પહેલો ગુનો હતો, તેથી તેણીને એક ડિમેરિટ પોઈન્ટ આપવામાં આવ્યો છે.

સિદરાએ સ્વીકારી પોતાની ભૂલ 

ICC અનુસાર, સિદ્રાએ ગુનો સ્વીકાર્યો અને અમીરાત ICC ઇન્ટરનેશનલ પેનલ ઓફ મેચ રેફરી શાન્ડ્રે ફ્રિટ્ઝ દ્વારા પ્રસ્તાવિત દંડ સ્વીકાર્યો, આમ ઔપચારિક સુનાવણીની જરૂરિયાત ટાળી. આ આરોપ ઓન-ફિલ્ડ અમ્પાયર લોરેન એઝેનબેગ અને નિમાલી પરેરા, થર્ડ અમ્પાયર કરીન ક્લાઉસ્ટે અને ફોર્થ અમ્પાયર કિમ કોટન દ્વારા ફટકારવામાં આવ્યો. ICC અનુસાર, લેવલ 1 ઉલ્લંઘન માટે લઘુત્તમ દંડ સત્તાવાર ઠપકો છે, જ્યારે મહત્તમ દંડ ખેલાડીની મેચ ફીમાંથી 50% કપાત અને એક કે બે ડિમેરિટ પોઇન્ટ છે.

ઉલ્લેખનીય છે કે ભારત અને પાકિસ્તાન વચ્ચેની આ મહત્વપૂર્ણ મેચ દરમિયાન, બંને ટીમોના કેપ્ટનોએ હાથ મિલાવ્યા ન હતા. અગાઉ, એશિયા કપ દરમિયાન, સૂર્યકુમાર યાદવ અને તેમની ટીમે પણ હાથ ન મિલાવવાની નીતિનું પાલન કર્યું હતું.