રાજયમાં ફરી એકવાર કોરોના વિસ્ફોટ, પાલડી NID કેમ્પસમાં 3 દિવસમાં કુલ 24 વિદ્યાર્થીઓ કોરોનાં પોઝિટિવ

ગુજરાતમાં કોરોનાના દર્દીઓ વધી રહ્યા છે. ત્યારે અમદાવાદની નેશનલ ઇન્સ્ટિટ્યૂટ ઓફ ડિઝાઇનમાં કોવિડના 24 દર્દીઓ મળી આવ્યા છે, જ્યારે 178ને ક્વોરેન્ટાઇન કરવામાં આવ્યા છે. જેથી અમદાવાદ મ્યુનિસિપલ કોર્પોરેશને NID કેમ્પસને એક નાનો કન્ટેઈનમેન્ટ ઝોન બનાવ્યો છે. NIDના બે વિદ્યાર્થીઓની હાલત હાલ નાજુક છે, તેઓ હોસ્પિટલમાં દાખલ છે.

ગુજરાતની શૈક્ષણિક સંસ્થામાં બીજી વખત કોવિડ બ્લાસ્ટ થયો છે. અગાઉ, ગયા મહિને ગાંધીનગરની ગુજરાત નેશનલ લો યુનિવર્સિટી (GNLU) માં કોવિડના 162 દર્દીઓ મળી આવ્યા હતા. જોકે, હવે GNLU કોવિડ ફ્રી થઈ ગયો છે.

ગુજરાતની સાથે સાથે દેશના અન્ય રાજ્યો પણ કોરોનાના વધી રહેલા કેસ સામે ઝઝૂમી રહ્યા છે. 7 મેના રોજ છેલ્લા 24 કલાકમાં દેશમાં લગભગ ચાર હજાર કોરોના કેસ નોંધાયા હતા. જ્યારે ગઈકાલે એટલે કે 8 મેના રોજ 24 કલાકમાં 3451 કોવિડ દર્દીઓ મળી આવ્યા હતા. ગુજરાતની વાત કરીએ તો, હાલમાં રાજ્યમાં 147 કોવિડ કેસ સક્રિય છે. તે જ સમયે, આવા 1590 લોકો છે જે ક્વોરેન્ટાઇનમાં છે. રાજ્યમાં અત્યાર સુધીમાં 10,941 લોકોએ કોરોનાથી જીવ ગુમાવ્યો છે.

દેશના અન્ય રાજ્યોની જેમ ગુજરાતમાં પણ કોરોનાની ત્રીજી લહેર અટકી ગઇ હતી. પરંતુ ત્યારબાદ 21 એપ્રિલ 2022ના રોજ જામનગરમાં એક પાંચ વર્ષની બાળકીએ કોરોનાથી જીવ ગુમાવ્યો હતો. ત્યારબાદ 100 દિવસ બાદ રાજ્યમાં કોરોનાથી એક મોત થયું હતું. આનાથી સ્પષ્ટ થયું કે કોરોનાની હવે બાળકો પર પણ ગંભીર અસર થઈ રહી છે. હજુ પણ વિવિધ રાજ્યોમાં શાળાના બાળકો કોરોનાથી સંક્રમિત થયાના અહેવાલો છે.