ઓરિસ્સાના પ્રિંસ ડાંસ ગ્રુપ ટીવી રિયાલીટી શો 'ઈંડિયાઝ ગોટ ટેલેંટ' દ્વારા મુંબઈમાં શનિવારે રાત્રે આયોજીત ગ્રાંડ ફિનાલેમાં વિજેતા જાહેર થયા છે. મિત્રો અને સંબંધીઓથી બનેલ આ ગ્રુપને ઓરિસ્સાના મુખ્યમંત્રી નવીન પટનાયક સહિત અનેક સામાજીક સંસ્થાઓ અને કોર્પોરેશન સંસ્થાઓએ તેમની પ્રતિભાના વખાણ કરી તેમની જીતને પ્રશંસા સાથે આવકારી હતી.
આ વિજેતા ટીમને ઈનામ રૂપે રૂપિયા 50 લાખની રોકડ રકમ અને સ્વીસની નવી ગાડી મારુતિ સુઝુકી રીટ્ઝ કાર મળી.
આ ગ્રુપમાં જોડાયેલા 22 વર્ષ કરતા ઓછી વયના 26 કલાકારોએ મહાભારત પર આધારિત નૃત્ય-નાટિકા રજૂ કરીને જજ પેનલને પણ મંત્રમુગ્ધ કરી નાખી હતી. .
આ ગ્રુપના કેટલાક કલાકારો સિલ્વર પેઈંટથી રંગાયેલા હતા, જેમાંથી એક કલાકારે ભગવાન ક્રિષ્ણનો રોલ ભજવ્યો હતો.
આ ગ્રુપને 26 વર્ષીય ક્રિષ્ણા મોહન રેડ્ડીએ ડાંસ ટીચર તરીકે પ્રશિક્ષણ આપ્યુ હતુ. આ ગ્રુપ ઓરિસ્સાના બેહરામપુરી જિલ્લાના એક ગામમાંથી આવેલુ છે. આ ગ્રુપમાં કેટલીક મહિલાઓનો પણ સમાવેશ હતો.
ફિલ્મકાર શેખર કપૂર અને હીરોઈન સોનાલી બેન્દ્રે અને કિરણ ખેર આ કાર્યક્રમના જજ હતા. આ ગ્રાડ ફિનાલેમાં બોલીવુડના સ્ટાર કલાકાર શાહિદ કપૂર અને રાની મુખર્જીએ હાજરી આપીને કાર્યક્રમની શોભા વધારી દીધી હતી. આ સ્ટાર કલાકારો પોતાની આવનારી ફિલ્મ 'દિલ બોલે હડિપ્પા'ની જાહેરાત કરવા આવ્યા હતા.