અફઘાનની જીત સાથે ન્યુઝીલેન્ડ WC થી બહાર

અમેરિકા અને વેસ્ટ ઇન્ડિઝમાં રમાઈ રહેલી ટી20 વર્લ્ડકપ ટૂર્નામેન્ટમાંથી ન્યૂઝીલૅન્ડ બહાર થઈ ગયું છે. અફઘાનિસ્તાને ટી20 વર્લ્ડકપમાં પાપુઆ ન્યૂ ગિનીને હરાવ્યું છે અને તેને કારણે તે સુપર-8 માટે ક્વોલિફાય થઈ ગયું છે.

ત્રિનિદાદના બ્રાયન લારા સ્ટેડિયમમાં રમાયેલી આ મૅચમાં અફઘાનિસ્તાને પાપુઆ ન્યૂ ગિનીને 19.2 ઓવરમાં 95 રનોમાં સમેટી લીધું.

બાદમાં બેટિંગમાં ઊતરેલી અફઘાનિસ્તાનની ટીમે ત્રણ વિકેટના નુકસાન પર 15.1 ઓવરમાં 101 રન બનાવીને જીત હાંસલ કરી.

અફઘાનિસ્તાન આ જીત બાદ વેસ્ટ ઇન્ડિઝની સાથે ગ્રૂપ સીમાંથી સુપર-8માં ક્વોલિફાય થઈ ગયું છે. બીજી તરફ ન્યૂઝીલૅન્ડ, યુગાંડા અને પાપુઆ ન્યૂ ગિની એક પણ મૅચ જીતી શક્યા નથી તેથી તેઓ ટૂર્નામેન્ટમાંથી બહાર થઈ ગયા છે.