Mumbai Train Accident - મુંબઈમાં મોટો ટ્રેન અકસ્માત, ચાલતી ટ્રેનમાંથી ૧૦-૧૨ લોકો પડી ગયા

મહારાષ્ટ્રના થાણેમાં મુમ્બ્રા અને દિવા રેલ્વે સ્ટેશન વચ્ચે એક દુ:ખદ અકસ્માત થયો. ટ્રેનમાંથી પડી જવાથી ૩ મુસાફરોના મોત થયા. રેલ્વે અને પોલીસ આ મામલાની તપાસ કરી રહી છે.

અકસ્માત કેવી રીતે થયો તે હજુ સુધી જાણી શકાયું નથી

મધ્ય રેલ્વેના મુખ્ય જનસંપર્ક અધિકારી સ્વપ્નિલ નીલાએ જણાવ્યું હતું કે કસારા જતી ટ્રેનના ગાર્ડે સવારે લગભગ ૯.૩૦ વાગ્યે કંટ્રોલ રૂમને જાણ કરી હતી કે ઘાયલ મુસાફરો ટ્રેકની બાજુમાં પડેલા છે. તેમણે કહ્યું કે ઘાયલ મુસાફરોને નજીકની હોસ્પિટલોમાં લઈ જવામાં આવ્યા છે. મુસાફરો કઈ ટ્રેનમાંથી પડી ગયા તે હજુ સુધી જાણી શકાયું નથી. થાણે સ્ટેશન મેનેજરે જણાવ્યું હતું કે ઓછામાં ઓછા પાંચ ઘાયલોને અહીં હોસ્પિટલમાં દાખલ કરવામાં આવ્યા છે. અન્ય એક અધિકારીએ જણાવ્યું હતું કે અકસ્માત કેવી રીતે થયો તે તાત્કાલિક જાણી શકાયું નથી.

થાણે સરકારી રેલ્વે પોલીસ (GRP) ના વરિષ્ઠ પોલીસ નિરીક્ષક અર્ચના દુસાણેએ જણાવ્યું હતું કે તેમને માહિતી મળી હતી અને તેઓ ઘટનાસ્થળે પહોંચ્યા હતા. તેમણે જણાવ્યું હતું કે કેટલાક મુસાફરો ભીડવાળી ટ્રેનમાંથી પડી ગયા હતા. તે જ સમયે, બાજુના ટ્રેક પરથી એક મેઇલ/એક્સપ્રેસ ટ્રેન પણ પસાર થઈ રહી હતી.