ઉજ્જૈન રેલ્વે સ્ટેશન પર ઉભી રહેલી ઈન્દોર-રતલામ પેસેન્જર ટ્રેનની બોગીમાં રવિવારે રાત્રે અચાનક આગ ફાટી નીકળી હતી. આગે થોડી જ વારમાં વિકરાળ સ્વરૂપ ધારણ કર્યું હતું. જેના કારણે સ્ટેશન પર હોબાળો મચી ગયો હતો. આગમાં એક બોગી સંપૂર્ણપણે બળીને ખાખ થઈ ગઈ હતી. સદનસીબે તે સમયે ટ્રેન ખાલી હતી. જેના કારણે મોટી દુર્ઘટના ટળી હતી.
મીડિયા રિપોર્ટ્સ અનુસાર, ઈન્દોર-રતલામ-બીના પેસેન્જર ટ્રેન નાગદા સ્ટેશનથી ઉજ્જૈન જવા માટે પ્લેટફોર્મ નંબર 5 પર સાંજે 7.40 વાગ્યે આવી હતી. આ તેનું છેલ્લું સ્ટોપેજ હતું. મુસાફરોને ઉતાર્યા બાદ ટ્રેનને પ્લેટફોર્મ નંબર 8 પર રાત્રે 8.40 કલાકે ઉભી રાખવામાં આવી હતી. 11.45 કલાકે ટ્રેનની એક બોગીમાં અચાનક આગ લાગી હતી. ધુમાડો અને આગની જ્વાળાઓ નીકળતી જોઈને આરપીએફ જીઆરપી અને રેલવે કર્મચારીઓની ટીમ ઘટનાસ્થળે પહોંચી ગઈ હતી. કામદારોએ આગ ઓલવવાનું શરૂ કર્યું. ફાયર બ્રિગેડને જાણ કરવામાં આવી હતી. જે બાદ ફાયર બ્રિગેડની ચાર ફાયર એન્જિન પ્લેટફોર્મ પર પહોંચી હતી. લગભગ એક કલાકની જહેમત બાદ આગ પર કાબુ મેળવ્યો હતો.