મોસ્કો-ગોવા ફ્લાઈટને બોમ્બની ધમકી મળી છે, જે બાદ પ્લેનને ઉઝબેકિસ્તાન તરફ વાળવામાં આવ્યું છે. સમાચાર એજન્સી પીટીઆઈના જણાવ્યા અનુસાર, રશિયાની રાજધાની મોસ્કોથી 240 મુસાફરોને લઈને જતી ગોવાની ચાર્ટર્ડ ફ્લાઈટ પર શનિવારે વહેલી સવારે બોમ્બની ધમકી મળી હતી. આ પછી વિમાનને ઉઝબેકિસ્તાન તરફ વાળવામાં આવ્યું હતું. પોલીસે આ અંગે માહિતી આપી હતી.
ગોવામાં લેન્ડિંગ પહેલા એરક્રાફ્ટ ડાયવર્ટ કરવામાં આવ્યું
એક વરિષ્ઠ પોલીસ અધિકારીએ જણાવ્યું કે વિમાન સવારે 4.15 વાગ્યે દક્ષિણ ગોવાના ડાબોલિમ એરપોર્ટ પર ઉતરવાનું હતું. તેમણે કહ્યું કે અઝુર એર દ્વારા સંચાલિત ફ્લાઇટ (AZV2463) ભારતીય હવાઈ ક્ષેત્રમાં પ્રવેશતા પહેલા ડાયવર્ટ કરવામાં આવી છે. અધિકારીએ જણાવ્યું કે દાબોલિમ એરપોર્ટના ડાયરેક્ટરને બપોરે 12.30 વાગ્યે પ્લેનમાં બોમ્બ મુકવામાં આવ્યો હોવાનો ઈ-મેલ મળ્યો હતો, ત્યારબાદ ફ્લાઈટને ડાયવર્ટ કરવામાં આવી હતી.
મોસ્કો-ગોવાની ફ્લાઇટનું જામનગરમાં લેન્ડિંગ થયું હતું
તમને જણાવી દઈએ કે આ ઘટના એવા સમયે બની છે જ્યારે ગત સપ્તાહે મોસ્કોથી ગોવા જતી ફ્લાઈટને બોમ્બની ધમકી મળી હતી, ત્યારબાદ મોસ્કો-ગોવા ફ્લાઈટનું ગુજરાતના જામનગર એરપોર્ટ પર ઈમરજન્સી લેન્ડિંગ કરવામાં આવ્યું હતું.