ભારતીય જનતા પાર્ટીએ પોતાનાં લોકસભા ઉમેદવારોની પ્રથમ યાદી જાહેર થઇ ગઇ છે. કુલ 54 બેઠકો પર ઉમેદવારોનાં નામનું એલાન થઇ ગયું છે, જેમાં 16 બેઠકો મહારાષ્ટ્રની છે જ્યારે અન્ય બેઠકોમાં 3 હિમાચલ, 5 જ્મ્મુ કાશ્મીર,2 અરૂણાચલ, 17 પશ્ચિમબંગાળ અને 6 બેઠક ઓડિશાનો સમાવેશ થયો છે.
પ્રથમ યાદીમાં જે લોકોનાં નામ હાજર છે, તેમાં ભાજપાનાં પૂર્વ અધ્યક્ષ નિતિન ગડકરી પણ છે. તેઓ નાગપુરથી ચૂંટણી લડશે. ગોપીનાથ મૂંડે બીડ બેઠક પરથી ચૂંટણી લડશે. કિરીટ સોમૈયા ઉત્તર પૂર્વ મુંબઇ અને દિલીપ ગાંધી અહમદનગરથી ચૂંટણી લડશે તેવી જાહેરાત કરવામાં આવી છે.
ભાજપની કેન્દ્રીય ચૂંટણી સમિતિએ ભાજપના વડામથકે બે કલાક સુધી ચાલેલી ચર્ચા બાદ આ નામ ઉપર અંતિમ મહોર મારી હતી.
આ બેઠકમાં નરેન્દ્ર મોદી, એલ.કે.અડવાણી, રાજનાથસિંહ, સુષમા સ્વરાજ, અરુણ જેટલી, મુરલી મનોહર જોશી અને એમ.વેંકૈયા નાયડુ જેવા ટોચના નેતાઓ હાજર રહ્યાં હતાં.