Publish Date: Fri, 13 Mar 2026 (08:49 IST)
Updated Date: Fri, 13 Mar 2026 (08:52 IST)
ગુજરાત સરકારના આરોગ્ય અને પરિવાર કલ્યાણ વિભાગ દ્વારા રાજ્યના લાખો સરકારી કર્મચારીઓ માટે એક અત્યંત મહત્વપૂર્ણ અને રાહતરૂપ નિર્ણય લેવામાં આવ્યો છે. ગુજરાત રાજ્ય સેવા (તબીબી સારવાર) નિયમો, 2002 અંતર્ગત 'કુટુંબ'ની વ્યાખ્યામાં મોટો સુધારો કરવામાં આવ્યો છે. આ સુધારા થકી હવે સરકારી કર્મચારીઓ પર આર્થિક રીતે આધારિત અન્ય સભ્યોને પણ મફત તબીબી સારવારનો લાભ મળશે.
'કુટુંબ'ની વ્યાખ્યામાં વિસ્તરણ અગાઉના નિયમો મુજબ, મેડિકલ બેનિફિટ્સ માત્ર કર્મચારીના પતિ કે પત્ની, બાળકો અને માતા-પિતા પૂરતા જ સીમિત હતા. પરંતુ, સરકારે આ જૂની વ્યાખ્યાને રદ કરીને તેને વધુ વ્યાપક બનાવી છે. નવી વ્યાખ્યા અનુસાર, હવે કર્મચારી પર નિર્ભર ભાઈ-બહેન તેમજ દત્તક સંતાનોને પણ આ તબીબી સારવાર યોજના હેઠળ આવરી લેવામાં આવ્યા છે, જેથી તેઓ પણ યોગ્ય સારવાર મેળવી શકે.
લાભ માટેની મુખ્ય શરતો અને આવક મર્યાદા આ લાભ મેળવવા માટે સરકારે કેટલીક શરતો અને આર્થિક નિર્ભરતાની મર્યાદા સ્પષ્ટ કરી છે. પ્રથમ શરત એ છે કે આ નિર્ભર સભ્યો કર્મચારીની સાથે જ રહેતા હોવા જોઈએ. બીજું, જો પરિવારના તે સભ્યની પેન્શન સહિતના તમામ સ્ત્રોતોમાંથી થતી કુલ માસિક આવક રૂ 500 થી વધુ ન હોય, તો જ તેમને કર્મચારી પર 'પૂર્ણત: આશ્રિત' ગણીને આ યોજનાનો લાભ આપવામાં આવશે.
તાત્કાલિક અસરથી અમલ આરોગ્ય વિભાગ દ્વારા આ અંગેનો સત્તાવાર પરિપત્ર જાહેર કરી દેવામાં આવ્યો છે અને આ નવા નિયમો તાત્કાલિક અસરથી અમલમાં પણ મૂકી દેવામાં આવ્યા છે. સરકારના આ પગલાથી લાભાર્થીઓની યાદીમાં વધુ સ્પષ્ટતા આવશે અને યોગ્ય નિર્ભર સભ્યો વગર કોઈ અડચણે મેડિકલ સુવિધા મેળવી શકશે.
મધ્યમ વર્ગને મોટી આર્થિક રાહત રાજ્ય સરકારના આ નિર્ણયથી મધ્યમ વર્ગીય સરકારી પરિવારોને ખૂબ જ મોટો ફાયદો થશે. માંદગીના સમયે જ્યારે મેડિકલ ખર્ચાઓ વધતા હોય છે, ત્યારે આર્થિક રીતે નિર્ભર ભાઈ-બહેન કે અન્ય સભ્યોની સારવારનો બોજ હળવો થશે. આ નિર્ણય સરકારી કર્મચારીઓની ચિંતા દૂર કરવામાં અને તેમના પરિવારને આરોગ્ય સુરક્ષા પૂરી પાડવામાં અત્યંત ઉપયોગી સાબિત થશે.
