IND vs ENG: કેપ્ટન શુભમન ગિલેનાં નામનો વાગ્યો ડંકો, સદી ફટકારીને બન્યો આવું કરનાર ચોથો ભારતીય કેપ્ટન

ભારતીય ટેસ્ટ ટીમના નવા કેપ્ટન શુભમન ગિલે આ જવાબદારી ખૂબ જ શાનદાર રીતે બેટિંગથી શરૂ કરી છે. રોહિત શર્માના ટેસ્ટ ક્રિકેટમાંથી નિવૃત્તિ બાદ શુભમન ગિલને આ ફોર્મેટમાં ટીમ ઈન્ડિયાનો નવો ટેસ્ટ કેપ્ટન બનાવવામાં આવ્યો છે. ગિલની કેપ્ટનશીપ હેઠળ, ભારતીય ટીમ પાંચ મેચની ટેસ્ટ શ્રેણી રમવા માટે ઈંગ્લેન્ડ પહોંચી છે, જેમાં શ્રેણીની પહેલી મેચ બંને ટીમો વચ્ચે લીડ્સના મેદાન પર રમાઈ રહી છે. આ મેચમાં, ટીમ ઈન્ડિયાને પહેલા બેટિંગ કરવાનો મોકો મળ્યો છે, જેમાં દિવસના છેલ્લા સત્રમાં કેપ્ટન શુભમન ગિલના બેટમાંથી ઐતિહાસિક સદીની ઇનિંગ જોવા મળી હતી.

ગિલ સદી ફટકારીને આ કિસ્સામાં ચોથો ભારતીય કેપ્ટન બન્યો

જ્યારે શુભમન ગિલ તેના ટેસ્ટ કારકિર્દીમાં પહેલીવાર ટીમ ઈન્ડિયાનું નેતૃત્વ કરી રહ્યો છે, ત્યારે પહેલીવાર તે નંબર-4 પોઝિશન પર બેટિંગ કરવા માટે પણ ઉતર્યો છે. ગિલે અત્યાર સુધી પહેલા દિવસની રમતમાં આ બંને જવાબદારીઓ ખૂબ જ સારી રીતે નિભાવી છે, જેમાં તે તેની બેટિંગ દરમિયાન એક પણ વખત દબાણમાં દેખાયો નથી. ગિલ ભારત તરફથી ચોથો કેપ્ટન પણ બન્યો છે જેણે કેપ્ટન તરીકે પોતાની પહેલી ટેસ્ટ મેચ રમતી વખતે પહેલી ઇનિંગમાં સદી ફટકારી છે. ગિલ પહેલા આ સિદ્ધિ વિજય હજારે, સુનીલ ગાવસ્કર અને વિરાટ કોહલીએ મેળવી હતી.

ભારતીય ટીમના કેપ્ટન તરીકે ટેસ્ટની પહેલી ઇનિંગમાં સદી ફટકારનારા ખેલાડીઓ

વિજય હજારે - 164 રન અણનમ (ઇંગ્લેન્ડ સામે, 1951, દિલ્હી)

સુનીલ ગાવસ્કર - 116 રન (ન્યૂઝીલેન્ડ સામે, 1976, ઓકલેન્ડ)

વિરાટ કોહલી - 115 રન (ઓસ્ટ્રેલિયા સામે, 2014, એડિલેડ)

શુભમન ગિલ - ૧૨૭* રન (ઇંગ્લેન્ડ સામે, ૨૦૨૫, લીડ્સ)

ગિલે મન્સૂર અલી ખાન પટૌડીનો રેકોર્ડ તોડ્યો

શુભમન ગિલે ભૂતપૂર્વ ભારતીય ખેલાડી મન્સૂર અલી ખાન પટૌડીનો ઇંગ્લેન્ડમાં ટેસ્ટ ક્રિકેટમાં ભારતીય કેપ્ટન તરીકે પચાસથી વધુ રન બનાવનારા સૌથી નાની ઉંમરના ખેલાડીનો રેકોર્ડ તોડ્યો છે. ગિલે 25 વર્ષ અને 285 દિવસની ઉંમરે આ સિદ્ધિ મેળવી છે, જ્યારે મન્સૂર અલી ખાન પટૌડીએ 1967માં ભારતીય ટીમની કેપ્ટનશીપ દરમિયાન 26 વર્ષ અને 174 દિવસની ઉંમરે ઇંગ્લેન્ડમાં પચાસથી વધુ રનની ઇનિંગ રમી હતી.