Publish Date: Mon, 06 Apr 2026 (16:44 IST)
Updated Date: Mon, 06 Apr 2026 (16:46 IST)
Mallikarjun Kharge illiterate Remark: કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેએ કેરળમાં એક ચૂંટણી રેલી દરમિયાન ગુજરાતના લોકો વિશે કરેલી ટિપ્પણીથી મોટો વિવાદ સર્જાયો છે. ખડગેએ કથિત રીતે ગુજરાતના લોકોને "અભણ" ગણાવ્યા હતા અને કહ્યું હતું કે વડાપ્રધાન મોદી તેમને "મૂર્ખ" બનાવી રહ્યા છે. આ નિવેદન બાદ ગુજરાતથી લઈને દિલ્હી સુધી રાજકારણ ગરમાયું છે અને ભાજપના નેતાઓએ કોંગ્રેસ પાસે માફીની માંગ કરી છે.
સીએમ ભૂપેન્દ્ર પટેલનો વળતો પ્રહાર
ગુજરાતના મુખ્યમંત્રી ભૂપેન્દ્ર પટેલે આ નિવેદનને 6 કરોડ ગુજરાતીઓનું અપમાન ગણાવ્યું છે. તેમણે સોશિયલ મીડિયા પર પોતાની પ્રતિક્રિયા આપતા જણાવ્યું કે, ખડગેનું આ નિવેદન અત્યંત વાંધાજનક અને દુર્ભાગ્યપૂર્ણ છે. મુખ્યમંત્રીએ ઉમેર્યું કે ગુજરાત હંમેશા રાષ્ટ્રનિર્માણ અને વિકાસમાં અગ્રેસર રહ્યું છે, અને આવી ટિપ્પણીઓ કોંગ્રેસ પક્ષની સંકુચિત માનસિકતા તથા પીએમ મોદીના નેતૃત્વ પ્રત્યેની તેમની અસુરક્ષા દર્શાવે છે.
ગાંધી અને સરદારના અપમાન સાથે સરખામણી
મુખ્યમંત્રીએ આ વિવાદને ગુજરાતના પનોતા પુત્રો મહાત્મા ગાંધી અને સરદાર પટેલની ગરિમા સાથે પણ જોડ્યો હતો. તેમણે કહ્યું કે આવી ટિપ્પણીઓ માત્ર જનતાનું જ નહીં, પરંતુ ગાંધી અને સરદારની પવિત્ર ભૂમિનું પણ અપમાન છે. ભાજપના રાષ્ટ્રીય નેતાઓએ પણ સવાલ ઉઠાવ્યા છે કે શું કોંગ્રેસ મહાત્મા ગાંધી અને સરદાર પટેલને પણ આ જ દ્રષ્ટિથી જુએ છે?
ચૂંટણી ટાણે કોંગ્રેસની મુશ્કેલીમાં વધારો
આ વિવાદ એવા સમયે આવ્યો છે જ્યારે ગુજરાતમાં ટૂંક સમયમાં સ્થાનિક સ્વરાજ્યની ચૂંટણીઓ યોજાવાની છે અને કેરળમાં પણ 9 એપ્રિલે મતદાન થવાનું છે. ભાજપના નેતાઓના મતે, કોંગ્રેસના આવા નિવેદનોથી જનતામાં રોષ જોવા મળી રહ્યો છે, જેની સીધી અસર આગામી ચૂંટણીના પરિણામો પર પડી શકે છે. દિલ્હીમાં ભાજપના પ્રવક્તા સુધાંશુ ત્રિવેદીએ પણ આ મામલે કોંગ્રેસ પર આકરા પ્રહારો કર્યા છે.
જનતા આપશે યોગ્ય જવાબ
સીએમ ભૂપેન્દ્ર પટેલે વિશ્વાસ વ્યક્ત કર્યો હતો કે ગુજરાતની જાગૃત જનતા આવા અપમાનજનક નિવેદનોનો બેલેટ બોક્સ દ્વારા યોગ્ય જવાબ આપશે. તેમણે વધુમાં જણાવ્યું કે માત્ર ગુજરાત જ નહીં, પરંતુ કેરળના લોકો પણ આગામી સમયમાં કોંગ્રેસને નકારીને ભાજપની વિકાસની રાજનીતિને ટેકો આપશે. હાલ આ મામલે કોંગ્રેસ તરફથી હજુ સુધી કોઈ સત્તાવાર પ્રતિક્રિયા આપવામાં આવી નથી.
