Uttar pradesh- મંગળવારે વહેલી સવારે ઉત્તર પ્રદેશના કન્નૌજ જિલ્લાના થથિયા પોલીસ સ્ટેશન વિસ્તારમાં લખનૌ-આગ્રા એક્સપ્રેસ વે પર ગોરખપુરથી દિલ્હી જઈ રહેલી બસ ડિવાઈડર તોડીને વિરુદ્ધ દિશામાંથી આવી રહેલી ટ્રક સાથે અથડાઈ હતી.
જેના કારણે બસમાં સવાર ચાર મુસાફરોના મોત થયા હતા અને અન્ય 21 મુસાફરો ઘાયલ થયા હતા. પોલીસે આ માહિતી આપી હતી. પોલીસે જણાવ્યું કે બસમાં લગભગ 40 મુસાફરો હતા.
અધિક પોલીસ અધિક્ષક (ASP) ડૉ. સંસાર સિંહે જણાવ્યું કે મૃતકોની ઓળખ હજુ સુધી થઈ નથી અને ઘાયલોને તિરવામાં શ્રી ભીમરાવ આંબેડકર સરકારી મેડિકલ કોલેજમાં દાખલ કરવામાં આવ્યા છે.
ASPએ કહ્યું કે ઘાયલોની હાલત ગંભીર છે, તેમને તાત્કાલિક કાનપુર રિફર કરવામાં આવી રહ્યા છે.
તેમણે કહ્યું કે અકસ્માતને કારણે એક્સપ્રેસ વે પર લગભગ દોઢ કિલોમીટર લાંબો જામ થઈ ગયો હતો. કન્નૌજ પોલીસે ક્રેન વડે ટ્રક અને બસને હટાવી લીધી હતી, ત્યારબાદ ટ્રાફિક સુચારુ બન્યો હતો.
