Neet Exam- નીટ પરીક્ષામાં કથિત ધાંધલીને લીધે થઈ રહેલા વિરોધપ્રદર્શનો વચ્ચે, કેન્દ્રીય શિક્ષણમંત્રી ધર્મેન્દ્ર પ્રધાને કહ્યું છે કે સરકાર વિદ્યાર્થીઓના હિતોની સુરક્ષા માટે પ્રતિબદ્ધ છે અને પારદર્શિતા સાથે કોઈ બાંધછોડ કરવામાં આવશે નહીં.
શિક્ષણમંત્રીએ કહ્યું છે કે સરકાર ખામીયુક્ત પરીક્ષાઓ લેવા માટે પ્રતિબદ્ધ છે અને કોઈપણ ગુનેગારને છોડશે નહીં.
કેન્દ્રીય શિક્ષણ મંત્રીએ કહ્યું છે કે સમગ્ર મામલાની તપાસ માટે એક ઉચ્ચ સ્તરીય સમિતિની રચના કરવામાં આવી રહી છે.
ધર્મેન્દ્ર પ્રધાને કહ્યું કે પરીક્ષા સંબંધિત માહિતી અમને પટણાથી પણ મળી છે. નક્કર પુરાવાના આધારે દોષિતો સામે કાર્યવાહી કરવામાં આવશે.
તેમણે એમ પણ કહ્યું કે આ કેસમાં વધુ માહિતી ટૂંક સમયમાં ઉપલબ્ધ થશે.
શિક્ષણમંત્રીએ કહ્યું છે કે "અમે એવા નિષ્કર્ષ પર આવ્યા છીએ કે આ પ્રશ્ન પેપરલીકનો છે. હું નૈતિક જવાબદારી લઉં છું, દેશનું ભવિષ્ય સુરક્ષિત કરવું પડશે, પારદર્શિતા અને ગુણવત્તા જાળવવી પડશે."
બીજી તરફ બિહાર પોલીસની તપાસમાં એ સામે આવ્યું છે કે કેટલાક ઉમેદવારોને પરીક્ષા પહેલાં જ પેપરના પ્રશ્નો મળી ગયા હતા.
શિક્ષણમંત્રીએ કહ્યું, “બિહાર સરકાર અને ભારત સરકાર વચ્ચે સંકલન હતું, કેટલીક વિસંગતતાઓ અમારા ધ્યાન પર આવી છે. સમગ્ર પ્રક્રિયા પૂર્ણ થયા પછી, જે પણ જવાબદાર હશે તેને બક્ષવામાં આવશે નહીં. બિહાર પોલીસ આ મામલે વધુ તપાસ કરી રહી છે, તેને પૂર્ણ થવા દેવી જોઈએ.”
જો કે, તેમણે નીટ પરીક્ષા ફરીથી યોજવા સંબંધિત પ્રશ્નોના સ્પષ્ટ જવાબ આપ્યા ન હતા.
બિહારના ઉપ મુખ્ય મંત્રી વિજય સિંહાએ બિહારમાં કથિત પેપર લીકમાં રાષ્ટ્રીય જનતા દળના નેતા તેજસ્વી યાદવના નજીકના લોકોની સંડોવણી હોવાનો દાવો કર્યો છે. જોકે, શિક્ષણમંત્રીએ આ અંગે કોઈ ટિપ્પણી કરી ન હતી.
બીજી તરફ કૉંગ્રેસ નેતા રાહુલ ગાંધીએ પણ પેપરલીક મામલે પત્રકાર પરિષદને સંબોધી હતી અને કહ્યું હતું કે, “ભારતમાં સતત પેપરલીક થઈ રહ્યા છે અને નરેન્દ્ર મોદી કાં તો તેને રોકી શકતા નથી અથવા તેઓ તેને રોકવા માંગતા નથી.”
તેમણે કહ્યું હતું કે, “ભાજપ શાસિત રાજ્યો એ પેપરલીકના એપિસેન્ટર અને શિક્ષણ માફિયાઓની લેબોરેટરી બની ચૂક્યા છે.”
