સુરક્ષા સંબંધી ખતરાને જોતા સુરક્ષાના જોખમોને ધ્યાનમાં રાખીને સુપ્રીમ કોર્ટે મંગળવારે ચારધામ રોડ પહોળા કરવાના પ્રોજેક્ટને મંજૂરી આપી દીધી છે. જસ્ટિસ ડીવાય ચંદ્રચુડની આગેવાની હેઠળની બેન્ચે ભૂતપૂર્વ જસ્ટિસ એકે સિકરીની આગેવાની હેઠળ એક મોનિટરિંગ કમિટીની પણ રચના કરી હતી, જે સમયાંતરે સુપ્રીમ કોર્ટને પ્રોજેક્ટ વિશે માહિતગાર રાખશે. આ મોનિટરિંગ કમિટીને સંરક્ષણ મંત્રાલય, માર્ગ પરિવહન મંત્રાલય, ઉત્તરાખંડ સરકાર અને તમામ જિલ્લા ન્યાયાધીશો દ્વારા સમર્થન આપવામાં આવશે. જણાવી દઈએ કે તાજેતરના દિવસોમાં ચીન સાથે વધેલા તણાવને જોતા આ રોડ દ્વારા ભારતીય સેના ચીનની સરહદ સુધી પહોંચી શકશે.
આ પહેલા 11 નવેમ્બરના રોજ સુપ્રીમ કોર્ટે ચારધામ પ્રોજેક્ટમાં રસ્તાની પહોળાઈ વધારવા મામલે સુનાવણી બાદ પોતાનો નિર્ણય અનામત રાખ્યો હતો. કોર્ટે કેન્દ્ર અને અરજદાર બંનેની દલીલોને વિગતવાર સાંભળી હતી અને બંને પક્ષોને લેખિતમાં સૂચનો આપવા જણાવ્યું હતું.
12,000 કરોડના ખર્ચે વ્યૂહાત્મક 900-km-લાંબા ચારધામ પ્રોજેક્ટનો ઉદ્દેશ્ય ઉત્તરાખંડના ચાર પવિત્ર શહેરો - યમુનોત્રી, ગંગોત્રી, કેદારનાથ અને બદ્રીનાથને સર્વ-હવામાન જોડાણ પ્રદાન કરવાનો છે.
