ઉત્તરાખંડની હરિદ્વાર જેલમાંથી ચોંકાવનારા સમાચાર સામે આવી રહ્યા છે. અહીંની જેલમાં બંધ 15 કેદીઓ HIV અને AIDSથી પીડિત હોવાનું જાણવા મળ્યું છે. તમને જણાવી દઈએ કે તમામ 15 કેદીઓના ટેસ્ટ રિપોર્ટમાં પુષ્ટિ થઈ છે કે તેઓ એઈડ્સથી પીડિત છે. જેના કારણે જેલ પ્રશાસનમાં ખળભળાટ મચી ગયો છે.
સિનિયર જેલ અધિક્ષક મનોજકુમાર આર્યએ જણાવ્યું હતું કે, જિલ્લા જેલમાં 7 એપ્રિલે વિશ્વ આરોગ્ય દિવસ નિમિત્તે આયોજિત આરોગ્ય શિબિરમાં તમામ કેદીઓની આરોગ્ય તપાસ કરવામાં આવી ત્યારે કેદીઓ એઇડ્સથી પીડિત હોવાનું જણાયું હતું. તેમણે કહ્યું કે 15 કેદીઓના ટેસ્ટ રિપોર્ટમાં પુષ્ટિ થઈ કે તેઓ એઈડ્સથી પીડિત છે, તેમના માટે જિલ્લા જેલમાં એક અલગ બેરેક બનાવવામાં આવી છે અને ત્યાં તેમની સારવાર કરવામાં આવી રહી છે.
આ સાથે જ આર્યએ વધુમાં જણાવ્યું હતું કે હાલ હરિદ્વાર જિલ્લા જેલમાં 1100 કેદીઓ છે. આ પહેલા પણ જિલ્લા જેલમાં એઈડ્સના દર્દીઓ મળી આવ્યા છે.
