ગુજરાતમાં કાળઝાળ ગરમી, કયાં શહેરોમાં હીટ વેવની આગાહી?

રવિવારે ગુજરાતમાં 44 ડિગ્રી સાથે અમદાવાદ રાજ્યમાં સૌથી વધુ તાપમાન ધરાવતું શહેર હતું. જોકે, હવામાનવિભાગ પ્રમાણે સોમવારે ગરમીમાં સામાન્ય રાહત રહી શકે છે.

ટાઇમ્સ ઑફ ઇન્ડિયાના અહેવાલ પ્રમાણે, આગામી ત્રણ-ચાર દિવસમાં તાપમાનનો પારો બેથી ત્રણ ડિગ્રી ઘટી શકે છે.

હવામાનવિભાગની આગાહી પ્રમાણે, આગામી દિવસોમાં કચ્છ તેમજ ઉત્તર ગુજરાતમાં ગરમી સામાન્ય કરતાં થોડી વધારે રહેશે. જોકે, મધ્ય ગુજરાત અને સૌરાષ્ટ્રના કેટલાક ભાગોમાં લઘુતમ તાપમાનમાં વધારો થાય તેવી શક્યતા છે.

તાપમાનમાં ઘટાડો થવાની શક્યતા હોવા છતાં અમદાવાદ, ગાંધીનગર તેમજ કચ્છમાં હીટ વેવની આગાહી કરવામાં આવી છે.