નૂહમાં હિંસા બાદ ગુરુગ્રામના ડીએમએ મોટો નિર્ણય લીધો છે. ગુરુગ્રામમાં ખુલ્લામાં પેટ્રોલ અને ડીઝલનું વેચાણ નહીં થાય. પેટ્રોલ પંપ પર બોટલ કે ડબ્બામાં પણ પેટ્રોલ-ડીઝલ આપવામાં આવશે નહીં. નોંધપાત્ર વાત એ છે કે, સોમવારે નૂહમાં VHPના સરઘસને રોકવાના પ્રયાસ બાદ ફાટી નીકળેલી હિંસામાં ચાર લોકો માર્યા ગયા હતા અને ઘણા લોકો ઘાયલ થયા હતા. મુસ્લિમ પ્રભુત્વ ધરાવતા નૂહમાં હિંસાના સમાચાર ફેલાતાં જ સોહનામાં ટોળાએ ચાર વાહનો અને એક દુકાનને આગ ચાંપી દીધી હતી. મંગળવારે પણ ગુરુગ્રામના સેક્ટર-57 વિસ્તારમાં એક મસ્જિદ પર હુમલો થયો હતો, જેમાં એક વ્યક્તિનું મોત થયું હતું.
હિંસાની તપાસ NIAને સોંપવી જોઈએ: વિશ્વ હિન્દુ પરિષદ
હરિયાણામાં થયેલી હિંસાને લઈને વિશ્વ હિન્દુ પરિષદનું નિવેદન સામે આવ્યું છે. VHPએ કહ્યું છે કે હરિયાણામાં ધાર્મિક સરઘસ દરમિયાન થયેલી હિંસાની તપાસ NIAને સોંપવામાં આવે. વિશ્વ હિન્દુ પરિષદ (VHP) એ મંગળવારે હરિયાણામાં થયેલી હિંસાની ઘટનાને આતંકવાદી હુમલા સાથે સરખાવી હતી.
વિશ્વ હિંદુ પરિષદ (VHP)ના સંયુક્ત મહાસચિવ સુરેન્દ્ર જૈને જણાવ્યું હતું કે સોમવારે એક ધાર્મિક સરઘસ દરમિયાન હિંદુ શ્રદ્ધાળુઓ પર થયેલા હુમલા પૂર્વ આયોજિત હતા અને હરિયાણા કોંગ્રેસના કેટલાક નેતાઓ દ્વારા ઉશ્કેરવામાં આવ્યા હતા. તેમણે રાજ્ય પોલીસ પર ગુપ્તચર નિષ્ફળતાનો આરોપ પણ મૂક્યો અને દાવો કર્યો કે શોભાયાત્રા દરમિયાન હિંદુ શ્રદ્ધાળુઓ પર હુમલો કરવા માટે તોફાનીઓએ આધુનિક અને આગ લગાડનારા શસ્ત્રોનો ઉપયોગ કર્યો હતો. જૈને કહ્યું કે હરિયાણામાં હિંદુઓ પર હુમલાના વિરોધમાં બુધવારે VHP કાર્યકર્તાઓ દેશભરમાં વિરોધ પ્રદર્શન કરશે.
