સરકારે જમીનનો કબ્જો સંભાળતા અન્યાય થયો છે. તેથી બાળકોને ભણાવી શકાય તેમ નથી. તેવા કારણ સાથે ઘોઘા તાલુકાના ગામોના વાલીઓએ બાળકોના સ્કૂલ લિવિંગ સર્ટીફિકેટ કઢાવવા માટે અરજી કરી રહ્યા છે. આ પહેલા ગઇકાલે ઘોઘા તાલુકાના મલેકવદર ગામની સરકારી પ્રાથમિક શાળામાં આ અંગેની 30થી 40 જેટલી અરજી આવી હતી ત્યારે આજે ફરી તાલુકાના આલાપર ખડસલિયા, હોઇદડ સહિતના ગામોની શાળામાં આવી અરજી આવતા ખળભળાટ થઈ ગયો છે.
ભાવનગર-ઘોઘા તાલુકાના બાડી, હોઈદડ, મલેકવદર, પડવા, ખડસલિયા, થળસર, લાખણકા, થોરડી, રામપર, સુરકા અને આલાપર સહિત 11 ગામો જમીન બે દાયકા અગાઉ સંપાદિત કરવામાં આવી હતી. હવે કંપનીએ આ ગામોની જમીન પર માઈનિંગ કરવાનો નિર્ણય લેતા ખેડૂતો દ્વારા તેની સામે વિરોધ થયો હતો. આ વિરોધમાં ખેડૂતોએ અરજીમાં જણાવ્યું કે, તેમના સંતાન શાળામાં અભ્યાસ કરે છે. પરંતુ સરકાર દ્વારા તેમની જમીનનો બળજબરીથી કબ્જો લઈ લેવાયેલ હોઈ ખેડૂતોની સાથે થઈ રહેલ અન્યાય કોઈ સાંભળવા તૈયાર ન હોવાથી તેના વિરોધમાં તેઓ તેમના બાળકોને આગળ અભ્યાસ કરાવી શકે તેમ નથી. આથી તેમનું સ્કૂલ લિવિંગ સર્ટીફિકેટ કાઢી આપવામાં આવે. ખેડૂતોના આ વિરોધમાં ગઇકાલે મલેકવદર ગામની પ્રાથમિક શાળામાં અરજીઓ આવી હતી જ્યારે આજે તાલુકાના આલાપર ખડસલિયા, હોઇદડ સહિતના ગામોમાં પોતાના બાળકોને અભ્યાસ છોડાવી વિરોધ કરી રહ્યાં છે.
