ગુંડાઓ સાવધાન! "સામાન્ય જનતાને હેરાન કરશો તો ગુજરાત પોલીસ બનશે 'હનુમાન'" : DCM હર્ષ સંઘવી

Harsh Sanghavi

ગુજરાતના નાયબ મુખ્યમંત્રી હર્ષ સંઘવીએ રાજ્યમાં શાંતિ ડહોળનારા અને સામાન્ય લોકોને પરેશાન કરનારા અસામાજિક તત્વોને ખુલ્લી અને કડક ચેતવણી આપી છે. તેમણે સ્પષ્ટ શબ્દોમાં જણાવ્યું છે કે જો કોઈ બદમાશ સામાન્ય જનતાને હેરાન કરશે, તો ગુજરાત પોલીસ તેમને પાઠ ભણાવવા માટે 'હનુમાનજી' જેવું સ્વરૂપ ધારણ કરતા અચકાશે નહીં. ગુંડા તત્વોને સીધા કરવા અને કાયદો-વ્યવસ્થા જાળવી રાખવા માટે પોલીસે મજબૂત સંકલ્પ કર્યો છે.

વડોદરામાં 'નેત્રમ' કંટ્રોલ રૂમનું ઉદ્ઘાટન

નાયબ મુખ્યમંત્રીએ આ મહત્વનું નિવેદન વડોદરા શહેર પોલીસ મુખ્યાલય ખાતે 'પ્રોજેક્ટ વિશ્વાસ' હેઠળ નવનિર્મિત હાઇ-ટેક કમાન્ડ અને કંટ્રોલ રૂમ "નેત્રમ" ના ઉદ્ઘાટન પ્રસંગે આપ્યું હતું. આ અત્યાધુનિક કંટ્રોલ રૂમથી સમગ્ર શહેર પર ચાંપતી નજર રાખી શકાશે અને ભવિષ્યમાં તેને આર્ટિફિશિયલ ઇન્ટેલિજન્સ (AI) અને ફેસ રેકગ્નિશન જેવી આધુનિક ટેક્નોલોજીથી પણ સજ્જ કરવામાં આવશે. વડોદરાનો આ કંટ્રોલ રૂમ ગાંધીનગરના 'ત્રિનેત્ર' સાથે સીધો જોડાયેલો રહેશે.

સુરક્ષિત વડોદરા, સ્માર્ટ વડોદરા!

​વડોદરા પોલીસ ભવન ખાતે 'નેત્રમ' સિટી લેવલ કમાન્ડ એન્ડ કંટ્રોલ સેન્ટરનું નાગરિકોની સુરક્ષા માટે અર્પણ કરવામાં આવ્યું.

​આધુનિક ટેકનોલોજી અને સીસીટીવી સર્વેલન્સના સમન્વયથી આ સેન્ટર ગુનાખોરી ડામવા, ટ્રાફિક મેનેજમેન્ટ અને નાગરિકોની સુરક્ષા સુનિશ્ચિત… pic.twitter.com/QnuoXOLInN

— Harsh Sanghavi (@sanghaviharsh) March 21, 2026

સુરક્ષા માટે પોલીસ વિભાગની કટિબદ્ધતા

આ કાર્યક્રમમાં સ્ટેજ પર હાજર ડીજીપી ડૉ. કે.એલ.એન. રાવ તરફ ઈશારો કરતા હર્ષ સંઘવીએ કહ્યું કે, ડીજીપીના માર્ગદર્શન હેઠળ પોલીસે સામાન્ય નાગરિકોની સુરક્ષા સુનિશ્ચિત કરવાનું બીડું ઝડપ્યું છે. વડોદરાના પ્રભારી મંત્રી તરીકે તેમણે ખાતરી આપી હતી કે પોલીસ કમિશનર નરસિંહ કુમારના નેતૃત્વમાં શહેર પોલીસ આ દિશામાં સક્રિયપણે કામ કરી રહી છે. તેમણે ભારપૂર્વક ઉમેર્યું હતું કે ડીજીપી ખૂબ સક્ષમ છે અને તેમની કામગીરી ઉપર હું પોતે સીધી દેખરેખ રાખી રહ્યો છું.

"કોઈ ભલામણ નહીં ચાલે, મધરાતે પણ ફોન કરજો"

હર્ષ સંઘવીએ સામાન્ય લોકોને આશ્વાસન આપતા કહ્યું કે પોલીસ ટીમો વધુ સુરક્ષિત વાતાવરણ બનાવવા માટે કામ કરી રહી છે. જો ક્યાંય પોલીસ ભૂલ કરે છે, તો લોકો તેમને મધરાતે પણ ફોન કરી શકે છે. મુખ્યમંત્રી ભૂપેન્દ્ર પટેલના માર્ગદર્શનમાં ગૃહ વિભાગે નક્કી કર્યું છે કે રાજ્યમાં ગુંડાગીરી સહેજ પણ ચલાવી લેવાશે નહીં. ગુંડા તત્વો ભલે ગમે તેટલી તાકાત લગાવે કે નાની-મોટી રાજકીય ભલામણો લાવે, કોઈની પણ વાત સાંભળવામાં આવશે નહીં.

પાટણની કાર્યવાહી અને આગામી ચૂંટણીનો સંદર્ભ

હર્ષ સંઘવીની આ કડક ચેતવણીનો સંદર્ભ તાજેતરની પોલીસ કાર્યવાહીઓ સાથે પણ જોડાયેલો છે. નોંધનીય છે કે એક દિવસ અગાઉ જ ઉત્તર ગુજરાતના પાટણમાં માસ્ટરમાઇન્ડ ભાવેશ દેસાઈના ગેરકાયદેસર સામ્રાજ્ય સામે વહીવટીતંત્ર દ્વારા બુલડોઝર ફેરવી દેવામાં આવ્યું હતું. આ ઉપરાંત, આગામી અઠવાડિયે રાજ્યમાં શહેર અને જિલ્લા પંચાયતની ચૂંટણીઓની જાહેરાત થવાની સંભાવના છે, તેવા સમયે નાયબ મુખ્યમંત્રીનું આ નિવેદન અસામાજિક તત્વોમાં કાયદાનો ડર બેસાડવાનો સ્પષ્ટ સંદેશ આપે છે.