Publish Date: Mon, 23 Feb 2026 (18:38 IST)
Updated Date: Mon, 23 Feb 2026 (18:45 IST)
ભાવનગર જિલ્લાના શિહોર તાલુકાના સખાવદર ગામની સીમમાં પોલીસે અત્યાર સુધીની સૌથી મોટી કાર્યવાહી કરી છે. ગુપ્ત બાતમીના આધારે પોલીસે એક વાડી વિસ્તારમાં દરોડો પાડ્યો હતો, જ્યાં ખેતીના ઓથા હેઠળ ગેરકાયદેસર રીતે નશીલા પદાર્થોનું વાવેતર કરવામાં આવતું હોવાનું બહાર આવ્યું છે.
આ દરોડા દરમિયાન અંદાજે 1100 કિલોગ્રામ જેટલો લીલો ગાંજો અને અફીણનો જથ્થો મળી આવ્યો છે. જપ્ત કરાયેલા આ નશીલા પદાર્થોની બજાર કિંમત આશરે 10.50 કરોડ રૂપિયાથી પણ વધુ હોવાનું અંદાજવામાં આવ્યું છે, જે જિલ્લાની અત્યાર સુધીની સૌથી મોટી રિકવરી ગણાય છે.
પોલીસે આ ગેરકાયદે ખેતી કરવા બદલ બે સગા ભાઈઓની ધરપકડ કરી છે. પ્રાથમિક તપાસમાં એવી શંકા સેવાઈ રહી છે કે આ વિસ્તારમાં લાંબા સમયથી નશીલા પદાર્થોનું વાવેતર અને વેપાર ચાલતો હતો. હાલ પોલીસ દ્વારા આ બંને આરોપીઓની કડક પૂછપરછ કરવામાં આવી રહી છે.
ગુજરાત પોલીસની આ સફળ કામગીરીથી ડ્રગ્સ માફિયાઓમાં ફફડાટ વ્યાપી ગયો છે. આ માલ ક્યાં સપ્લાય થવાનો હતો અને આ નેટવર્ક પાછળ બીજા કયા મોટા માથાઓ સામેલ છે, તે દિશામાં ઉંડાણપૂર્વક તપાસ હાથ ધરવામાં આવી છે.
