મહારાષ્ટ્રના નાંદેડ જિલ્લામાંથી એક ખૂબ જ દર્દનાક અકસ્માતના સમાચાર સામે આવ્યા છે. શુક્રવારે સવારે હિંગોલીના વાસમત તાલુકાના ગુંજ ગામમાંથી ખેતરોમાં હળદર કાપવા માટે નીકળેલી મહિલા મજૂરોને લઈ જઈ રહેલું ટ્રેક્ટર નાંદેડના આલેગાંવ વિસ્તારમાં કંચનનગર પાસેના ઉંડા કૂવામાં પડી ગયું હતું. આ ભયાનક અકસ્માતમાં અત્યાર સુધીમાં 8 લોકોના મોત થયા હોવાના અહેવાલ છે, જ્યારે અન્ય ઘણા લોકો કૂવામાં ફસાયા હોવાની આશંકા છે.
આ ઘટના આજે સવારે 7 થી 7:30 વાગ્યાની વચ્ચે બની હતી જ્યારે મહિલાઓ ટ્રેક્ટર પર ખેતર તરફ જઈ રહી હતી. પ્રત્યક્ષદર્શીઓના જણાવ્યા અનુસાર આ વિસ્તારમાં વરસાદને કારણે રસ્તાઓ લપસણો બની ગયા હતા.
જેના કારણે ટ્રેક્ટરનું ટાયર સ્લીપ થઈ ગયું હતું અને ડ્રાઈવરે સંતુલન ગુમાવ્યું હતું. ટ્રેક્ટર સીધું પાણી ભરેલા કૂવામાં પડ્યું હતું. અકસ્માત એટલો ભયંકર હતો કે ટ્રેક્ટર સંપૂર્ણપણે પાણીમાં ડૂબી ગયું હતું.
