બિહારથી રાજ્યસભા પહોંચ્યા 5 નેતા, નીતિશ કુમાર અને નીતિન નવીન સહિત પાંચેય એનડીએ ઉમેદવારો જીત્યા

Bihar Rajya Sabha MP

રાજ્યસભા ચૂંટણીના પરિણામો જાહેર થઈ ગયા છે, અને બિહારના પાંચેય NDA ઉમેદવારોએ જીત મેળવી છે. NDAના પાંચમા ઉમેદવાર શિવેશ કુમાર બીજી પસંદગીના આધારે જીત્યા હતા. RJD એ ફક્ત એક જ ઉમેદવાર, અમરેન્દ્ર ધારી સિંહને મેદાનમાં ઉતાર્યા હતા, અને તેઓ પણ હારી ગયા હતા. બિહારના મુખ્યમંત્રી નીતિશ કુમારને પણ NDA દ્વારા નોમિનેટ કરવામાં આવ્યા હતા. તેઓ પણ જીત્યા હતા. પરિણામે, તેઓ રાજ્યસભાના સાંસદ બન્યા છે. હવે તેમણે મુખ્યમંત્રી પદેથી રાજીનામું આપવું પડશે.

પરિણામો જાહેર થાય તે પહેલાં જ, NDAના પાંચમા ઉમેદવાર શિવેશ કુમારે બીજા-પ્રિફરન્સ મતોમાં પોતાની લીડ જાહેર કરી દીધી હતી. પરિણામો જાહેર થયા પછી, સ્પષ્ટ થઈ ગયું કે તેમણે રાજ્યસભાની ચૂંટણી જીતી લીધી છે. રાજ્યસભાની ચૂંટણી બિહારના રાજકારણમાં નોંધપાત્ર ફેરફારો લાવવાની તૈયારીમાં છે. મુખ્યમંત્રી નીતિશ કુમારના ઉપલા ગૃહમાં પ્રવેશ સાથે, નવા મુખ્યમંત્રીની પસંદગી કરવામાં આવશે.

મહાગઠબંધનનાં ચાર ધારાસભ્યોએ ન કર્યું મતદાન 

જનતા દળ યુનાઇટેડના વરિષ્ઠ નેતા અને મંત્રી શ્રવણ કુમારે દાવો કર્યો હતો કે NDAના તમામ 202 ધારાસભ્યોએ મતદાન કર્યું હતું, જ્યારે વિપક્ષી મહાગઠબંધનના ચાર ધારાસભ્યોએ મતદાન કર્યું ન હતું. ઢાકાથી RJD ધારાસભ્ય ફૈઝલ રહેમાન અને કોંગ્રેસના ત્રણ ધારાસભ્યો - મણિહારીથી મનોહર પ્રસાદ સિંહ, વાલ્મીકીનગરથી સુરેન્દ્ર કુશવાહ અને ફોર્બ્સગંજથી મનોજ વિશ્વાસે મતદાન કર્યું ન હતું. ભાજપના રાષ્ટ્રીય અધ્યક્ષ અને બાંકીપુર વિધાનસભા બેઠકથી પાંચ વખત ધારાસભ્ય રહેલા નીતિન નવીન, RJDના રાષ્ટ્રીય કાર્યકારી પ્રમુખ તેજસ્વી યાદવ, BJPના ધારાસભ્ય મૈથિલી ઠાકુર અને જેલમાં બંધ જનતા દળ યુનાઇટેડના ધારાસભ્ય અનંત સિંહ સહિત વિવિધ નેતાઓએ પોતાના મતાધિકારનો ઉપયોગ કર્યો હતો. બિહાર વિધાનસભા પરિસરમાં સવારે 9 વાગ્યે મતદાન શરૂ થયું હતું અને સાંજે 5 વાગ્યા સુધી ચાલુ રહેશે. સાંજે 5 વાગ્યા પછી મત ગણતરી શરૂ થઈ હતી.

ભાજપે અમારા ધારાસભ્યો ચોરી લીધા - કોંગ્રેસ

કોંગ્રેસના ત્રણ ધારાસભ્યોના ગાયબ  થવા અંગે કોંગ્રેસ પ્રમુખ રાજેશ રામે કહ્યું, "ભાજપે અમારા ધારાસભ્યોને ચોરી લીધા. ભાજપ સત્તામાં છે. ત્રણેય ધારાસભ્યો 13 મી તારીખથી સતત સંપર્કમાં હતા. 13 મી તારીખની રાત સુધી, બધા ધારાસભ્યો કમ્ફર્ટેબલ હતા અને વાત કરી રહ્યા હતા. એવી તે શું વાત બની કે 13 મી તારીખ પછી ત્રણેય ધારાસભ્યો અમારી પહોચની બહાર થઈ ગયા ? ભાજપ જ્યાં પણ રહે છે,  મત ચોરી કરીને સરકાર બનાવે છે. ભાજપ અમારા ચૂંટાયેલા પ્રતિનિધિઓને ચોરી કરે છે. એક ધારાસભ્ય અમારી પાસે આવ્યા અને કહ્યું કે અમારા ધારાસભ્યોને નજરકેદ કરવામાં આવ્યા છે. તેમના ઘરની બહાર પોલીસ તૈનાત કરવામાં આવી છે. 13 મી તારીખ પછી અમારા ધારાસભ્યો ક્યારે ચોરાય  ગયા તે કહેવું મુશ્કેલ છે. અમે સિનીયર નેતાઓ સાથે વાતચીત કર્યા  =પછી તેમની સામે કાર્યવાહી કરીશું. આ અક્ષમ્ય છે."