ગુજરાતની 'દવે ડિજિટલ' કંપની દ્વારા ગાયિકા ચાંદની વેગડનું નવું ગુજરાતી આલ્બમ 'રાધા રાની લાગે'ને શનિવાર, 10 જુલાઈ, 2021ના તમામ ડિજિટલ પ્લેટફોર્મ પર રિલીઝ કરાયું છે. આ એક ભક્તિ ગીત છે, જે ખૂબ જ અલગ અંદાજમાં ગાયું છે. એટલું જ નહીં, અતિસુંદર રીતે ફિલ્માવવામાં આવ્યું છે. એનું શૂટિંગ ગુજરાતના પ્રસિદ્ધ યાત્રા ધામ દ્વારકાના વિવિધ અને પ્રસિદ્ધ સ્થળે કરવામાં આવ્યું છે. દ્વારકા શ્રીકૃષ્ણ ભગવાનની કર્મભૂમિ છે. ચાંદની વેગડનું ગીત સાંભળવાની સાથે આબાલ-વૃદ્ધ તમામ રાધા કૃષ્ણની ભક્તિમાં લીન થઈ જશે. આ વિડિયો આલ્બમના નિર્માતા જય દવે છે, દિગ્દર્શન દ્વિજ ત્રિવેદીનું છે તો સંગીત સુનીલ ચાવડા એ આપ્યું છે.
ચાંદની વેગડ ગુજરાતના જામનગરમાં રહેતા ભૂતપૂર્વ સિવિલ જજ કે. પી. વેગડની દીકરી છે. વેગડ પહલા જામનગરમાં રહેતા હતા, થોડા સમય પૂર્વે જ રાજકોટ રહેવા આવ્યા છે. ચાંદનીએ આ વરસે દસમા ધોરણની પરીક્ષા જામનગરની શ્રી સત્યસાઈ વિદ્યાલયથી પાસ કરી છે, અને હવે અગિયારમા ધોરણ માટે રાજકોટની રાજકુમાર કૉલેજમાં એડમિશન લીધું છે. એ ગાયકી સાથે અભ્યાસ પણ ચાલુ રાખવા માગે છે. એ ગુજરાત રાજ્ય અને મુંબઈના અનેક શોમાં ભાગ લઈ ચુકી છે. રાધા રાની લાગે આલ્બમ અંગે ચાંદની જણાવે છે કે, મેં દરેક પ્રકારનાં ગીતો ગાયાં છે અને ગાઈ શકું છું. આ ભક્તિ ગીત ઘણું સરસ હતું અને મને આ ગીત ગાવાનો મોકો મળ્યો. આનું શૂટિંગ પણ દ્વારકામાં થયું છે,આ આલ્બમ મારા માટે યાદગાર સંભારણું બની રહેશે. આશા છે કે લોકોને પણ આ ભક્તિ ગીત પસંદ પડશે.
આમ તો, ચાંદનીએ હાઈ-સ્પીડ સિને ઇન્ટરનેશનલ બેનર હેઠળ બની રહેલી એક હિન્દી ફીચર ફિલ્મ લિવિંગ રિલેશન સાઇન કરી છે, જેનું રેકોર્ડિંગ કોરોનાને કારણે થઈ શક્યું નથી, પરંતુ ટૂંક સમયમાં એનું રેકોર્ડિંગ મુંબઈમાં થશે.
