મહેસાણાના સ્ટેમ્પ વેન્ડરે દોઢ કરોડના સ્ટેમ્પ ખરીદ્યાં

સરકાર દ્રારા 500 અને 1000 નું ચલણ બંધ કરી દેવામાં આવ્યું છે. ત્યારે મહેસાણાના એક સ્ટેમ્પ વેન્ડર દ્વારા એક સાથે 1.02 કરોડનાં સ્ટેમ્પ ખરીદવાનો મુદો ભારે ચર્ચાસ્પદ બની ગયો છે. સ્ટેમ્પ વેન્ડરે જિલ્લા તિજોરી શાખામાં 1000, 10000 અને 25000 ના સ્ટેમ્પ માટે 52 લાખ અને 50 લાખનાં એમ એક સાથે 1.02 કરોડનાં ચલણ ભરતાં વિવાદ સર્જાયો છે. કાળા નાણાંને લઈ રૂપિયા ૫૦૦ અને હજારની નોટ પરત ખેંચ્યા બાદ લોકો થોડા રૂપિયા માટે લાઈનો લગાવી રહ્યાં છે ત્યારે મહેસાણા જિલ્લા તિજોરી શાખામાં બુધવારે એક સ્ટેમ્પ વેન્ડર દ્વારા એક સાથે રૂપિયા 1.02 કરોડના સ્ટેમ્પ પેપર માટે ચલણ ભરવાનો મુદો બહાર આવતા ભારે ચકચાર મચી જવા પામી છે. મહિને 10 લાખના સ્ટેમ્પ ખરીદતા સ્ટેમ્પવેન્ડર દ્વારા 52 અને 50 લાખ રૂપિયાના બે ચલણ ભરી આ સ્ટેમ્પ ખરીદવામાં આવ્યા છે. જેમાં 1000, 10000 અને 25000ના સ્ટેમ્પનો સમાવેશ થાય છે. સરકાર દ્વારા એક તરફ કાળાં નાણાંના મુદે તાત્કાલીક અસરથી રૂપિયા 1000 અને 500ની નોટો ચલણમાં થી રદ કરી દેવામાં આવી છે. અને સરકારી તંત્ર, હોસ્પિટલો અને પેટ્રોલપંપો સિવાય કોઈ સ્થળે આ નોટોને સ્વીકારી શકાતી નથી. લોકોને પોતાની પાસે રહેલી આ નોટો સરકાર દ્વારા બેન્કોમાં જમા કરાવવા માટે કહેવામાં આવ્યુ છે ત્યારે સ્ટેમ્પવેન્ડર દ્વારા એકી સાથે આટલી મોટી રકમના સ્ટેમ્પ ખરીદવાના આ પ્રકરણ માં નાણાં સેટલમેન્ટ કરવાનો કારસો હોવાનું ચર્ચાય રહયું છે.