મંગળવારે સવારે ઑસ્ટ્રિયાના ગ્રાઝ શહેરની એક હાઇ સ્કૂલમાં ગોળીબારની ઘટના બની હતી. આમાં ઓછામાં ઓછા 11 લોકો માર્યા ગયા હતા અને 28 ઘાયલ થયા હતા. તેમાંથી ઓછામાં ઓછા ચાર લોકોની હાલત ખૂબ જ ગંભીર છે. કેટલાક લોકોના માથામાં પણ ગોળી વાગી છે.
પોલીસે આ વિસ્તારમાં મોટી કાર્યવાહી શરૂ કરી છે અને લોકોને ત્યાંથી દૂર રહેવા માટે કહેવામાં આવ્યું છે. ઑસ્ટ્રિયન મીડિયા રિપોર્ટ્સ અનુસાર, સવારે લગભગ 10 વાગ્યે બોર્ગ ડ્રેયર્સચ્યુત્ઝેંગાસે હાઇ સ્કૂલની અંદર ગોળીબારનો અવાજ સંભળાયો હતો.
પોલીસ તરત જ ઘટનાસ્થળે પહોંચી ગઈ હતી. રિપોર્ટ અનુસાર, શંકાસ્પદ હુમલાખોર કદાચ એ જ સ્કૂલનો વિદ્યાર્થી હતો અને તેણે પોતાને ગોળી મારીને આત્મહત્યા કરી લીધી હતી. સ્કૂલના બાથરૂમમાં તેનો મૃતદેહ મળી આવ્યો હોવાની પણ માહિતી છે.
હુમલાખોર પણ માર્યો ગયો હોવાના સમાચાર
ઓસ્ટ્રિયન ગૃહ મંત્રાલયે એક નિવેદન બહાર પાડીને કહ્યું છે કે મૃતકોની વાસ્તવિક સંખ્યા હજુ જાહેર કરી શકાતી નથી, અને ઘાયલોની સંખ્યાની પણ પુષ્ટિ કરી શકાતી નથી. પોલીસ પ્રવક્તા સાબરી યોર્ગુને જણાવ્યું હતું કે પોલીસ હજુ પણ ત્યાં શું થયું તે શોધવાનો પ્રયાસ કરી રહી છે. હાલમાં, સ્થળ પર સ્પેશિયલ ફોર્સ કોબ્રા તૈનાત કરવામાં આવી છે.ઓસ્ટ્રિયન ચાન્સેલર ક્રિશ્ચિયન સ્ટોકર પણ ગ્રાઝ જવા રવાના થઈ ગયા છે, જ્યાં તેઓ એક પ્રેસ કોન્ફરન્સ યોજવાની યોજના ધરાવે છે.
