નવસારીના વાસદા તાલુકાના રવાણીયા ગામમાં આદિવાસી દંપતીએ બે બાળકોની હત્યા કરીને આપઘાત કર્યો હતો. આ હત્યા પાછળ પ્રેમ પ્રકરણ હોવાનું કહેવાય છે. જોકે પોલીસે આ મામલે બે ફરિયાદ નોંધી આગળની કાર્યવાહી હાથ ધરી છે. એક જ પરિવારના ચાર સભ્યોના મોતથી સમગ્ર ગામમાં શોકની લાગણી ફેલાઈ ગઈ છે.
નવસારીના વાસદા તાલુકાના રવાણીયા ગામમાં રહેતા 39 વર્ષીય ચુન્નીલાલ જટ્ટર ગાવિતના લગ્ન નવ વર્ષ પહેલા તનુજાબેન સાથે થયા હતા. નવ વર્ષના લગ્નજીવન દરમિયાન આ દંપતીને બે બાળકો થયા. ચુન્નીલાલ દમણ સ્થિત યુનિ બીજ નામની આયુર્વેદિક કંપનીમાં નેટવર્ક માર્કેટિંગમાં કામ કરતા હતા અને તનુજાબેન ગૃહિણી હતા.
મળતી માહિતી મુજબ ચુન્નીલાલને ડાંગ જિલ્લાની એક યુવતી સાથે પ્રેમસંબંધ હતો. જેના કારણે તેની પત્ની તનુજાબેન સાથે અવારનવાર ઝઘડા થતા હતા. જો કે ગતરાત્રે થયેલી મારામારી હિંસક બની હતી. બાદમાં દંપતી સુઈ ગયા હતા. પરંતુ આ દરમિયાન બંનેએ રોજબરોજના ઝઘડાનો અંત લાવવાનું નક્કી કર્યું, પરંતુ તેઓને બાળકોના ભવિષ્યની ચિંતા હતી. તેથી, અગાઉ દંપતીએ 7 વર્ષના કશિશ અને 4 મહિનાના દિત્યાનું ગળું દબાવીને હત્યા કરી હતી. બાદમાં બંનેએ પણ ઘરના ધાબા પર લટકીને આત્મહત્યા કરી લીધી હતી.
સવારે ચુન્નીલાલને ઘરની બહાર નીકળતા ન જોતા તેના પિતા તેને લેવા ગયા ત્યારે સમગ્ર ઘટનાની જાણ થઈ. પોલીસે આ મામલે બે કેસ નોંધ્યા છે. જેમાં મૃતક પતિ-પત્ની સામે બાળકોની હત્યા અને અન્ય એક બનાવમાં પતિ-પત્નીના અકસ્માતે મોતનો ગુનો નોંધવામાં આવ્યો છે. પોલીસે વિસેરાના સેમ્પલ સહિતના જરૂરી સેમ્પલ લઈને વધુ તપાસ શરૂ કરી છે
