પાકિસ્તાન અને દક્ષિણ આફ્રિકા વચ્ચે શ્રેણીની પહેલી વનડે ફૈસલાબાદમાં રમાઈ રહી છે. આ મેચમાં પાકિસ્તાનને જીતવા માટે 264 રનનો લક્ષ્યાંક હતો. આ લક્ષ્યનો પીછો કરવા માટે પાકિસ્તાની ટીમને ટોચના ક્રમના બેટ્સમેનોની સારી શરૂઆતની જોઈતી હતી. આ મેચમાં ટીમ માટે ફખર ઝમાને 45 રન અને સેમ અયુબે 39 રન બનાવ્યા, પરંતુ ત્રીજા નંબર પર બેટિંગ કરવા આવેલા બાબર આઝમ ફરી એકવાર નિષ્ફળ રહયો.
બાબર આઝમ પહેલી વનડેમાં ફ્લોપ રહ્યો
જ્યારે બાબર આઝમ પહેલી વનડેમાં બેટિંગ કરવા આવ્યો ત્યારે પાકિસ્તાનનો સ્કોર 1 વિકેટે 87 રન હતો. ટીમે સારી શરૂઆત કરી હતી અને ચાહકો ત્યાંથી મોટી ઇનિંગની આશા રાખી રહ્યા હતા. જોકે, તે 12 બોલમાં માત્ર 7 રન બનાવીને આઉટ થયો હતો, તેણે પોતાની ઇનિંગ દરમિયાન ફક્ત એક ફોર ફટકારી હતી. બાબરે છેલ્લા બે વર્ષમાં સદી ફટકારી નથી. તેની છેલ્લી સદી એશિયા કપ 2023માં નેપાળ સામે હતી.
80 દાવમાં પણ સદી ફટકારી ન શક્યો
અત્રે એ ઉલ્લેખનીય છે કે બાબર આઝમે તેની છેલ્લી 80 આંતરરાષ્ટ્રીય ઇનિંગમાં એક પણ સદી ફટકારી નથી. તેની છેલ્લી 30 વનડે ઇનિંગમાં, બાબરે 35 ની સરેરાશથી 945 રન બનાવ્યા છે. જોકે, આ સમયગાળા દરમિયાન તેણે એક પણ સદી ફટકારી નથી. જો બાબર બાકીની વનડેમાં પણ રન નહિ બનાવી શકે તો નજીકના ભવિષ્યમાં તેને ફોર્મેટમાંથી બહાર કરી શકાય છે. ટેસ્ટમાં પણ તેનું ફોર્મ ખાસ પ્રભાવશાળી રહ્યું નથી.
ટેસ્ટમાં પણ ખરાબ ફોર્મ સાથે સંઘર્ષ કરી રહ્યો છે બાબર
બાબર આઝમે છેલ્લા ત્રણ વર્ષમાં ટેસ્ટ ક્રિકેટમાં એક પણ સદી ફટકારી નથી. તેમણે 26 ડિસેમ્બર, 2022 ના રોજ કરાચીમાં ન્યુઝીલેન્ડ સામે 161 રન બનાવ્યા હતા. ત્યારથી, તેમણે આ ફોર્મેટમાં એક પણ સદી ફટકારી નથી. બાબર આઝમે અત્યાર સુધી 60 ટેસ્ટ મેચ રમી છે, જેમાં 109 ઇનિંગ્સમાં 42.58 ની સરેરાશથી 4258 રન બનાવ્યા છે, જેમાં નવ સદી અને 29 અડધી સદીનો સમાવેશ થાય છે. વનડેમાં, બાબર આઝમે 134 મેચોમાં 19 સદી ફટકારી છે, જ્યારે તેણે 128 T20I માં ત્રણ સદી ફટકારી છે.
