ભારત અને ઇંગ્લેન્ડ વચ્ચે રમાનારી ત્રણ વનડે સિરીઝ માટે ટીમ ઇન્ડિયાની ઘોષણા કરવામાં આવી છે. સૂર્યકુમાર યાદવને પણ ટી -20 બાદ વનડે ટીમમાં સામેલ કરવામાં આવ્યો છે. જ્યારે ક્રુનાલ પંડ્યા, મોહમ્મદ સિરાજ અને પ્રખ્યાત કૃષ્ણા પ્રથમ વખત વન ડે ટીમમાં સ્થાન મેળવવામાં સફળ થયા છે. ટેસ્ટ મેચોમાં નબળા ફોર્મ સાથે સંઘર્ષ કરનાર શુભમન ગિલને પણ ટીમમાં રાખવામાં આવ્યો છે. ભારતને ઈગ્લેંડ સાથે વનડે સીરીઝની પ્રથમ મેચ 23 મી માર્ચે પૂણેમાં રમવાની રહેશે.
વૉશીગન્ટન સુંદર પણ આ વખતે વનડે ટીમમાં પોતાનું સ્થાન બનાવવામાં સફળ રહ્યો છે. ટી 20 સીરીઝમાં ફોર્મની બહાર ચાલી રહેલા કેએલ રાહુલને પણ ટીમમાં સ્થાન છે, જ્યારે કે ઋsષભ પંત પણ ટી 20 પછી વનડે ટીમમાં કમબેક કરવામાં સફળ રહ્યા છે. ભુવનેશ્વર કુમારને પણ ટીમમાં સામેલ કરવામાં આવ્યો છે. ટેસ્ટમાં સતત સારા પ્રદર્શનની ભેટ મોહમ્મદ સિરાજને મળી છે. આ સાથે જ ચોથી ટી -20 મેચમાં શાનદાર હાફ સેંચુરી મારનાર સૂર્યકુમાર યાદવ વનડે ટીમમાં પોતાનુ સ્થાન બનાવવામાં સફળ રહ્યો છે. પોતાની ડેબ્યૂ મેચમાં શાનદાર અડધી સદી રમનાર ઈશાન કિશનને ટીમમાં સ્થાન આપવામાં આવ્યું નથી.
ભારત અને ઇંગ્લેન્ડ વચ્ચે રમાઈ રહેલી પાંચ મેચની ટી 20 સિરીઝ હાલમાં 2-2થી બરાબર છે. અમદાવાદના નરેન્દ્ર મોદી ક્રિકેટ સ્ટેડિયમ ખાતે રમાયેલી ચોથી ટી -20 મેચમાં ભારતની ટીમે ઇંગ્લેન્ડને રોમાંચક મેચમાં 8 રનથી હરાવ્યું હતું.ટીમ ઇન્ડિયા તરફથી સૂર્યકુમાર યાદવે તેની પ્રથમ ઇનિંગમાં 57 રનની શાનદાર ઇનિંગ્સ રમી હતી, જ્યારે શ્રેયસ ઐયરે ફટાફટ બેટિંગ કરીને 37 રન બનાવ્યા હતા. બોલિંગમાં શાર્દુલ ઠાકુરે ભારત તરફથી ત્રણ વિકેટ ઝડપી હતી. શ્રેણીની પાંચમી અને અંતિમ મેચ 20 માર્ચે આ મેદાન પર રમાશે.
