IND vs AUS: ભારતીય ક્રિકેટ ટીમને ઓસ્ટ્રેલિયા સામેની ત્રણ મેચની શ્રેણીની ત્રીજી વનડેમાં 66 રનથી હારનો સામનો કરવો પડ્યો છે. જો કે ટીમ ઈન્ડિયાએ આ સીરીઝ 2-1થી સરળતાથી જીતી લીધી હતી. આ મેચમાં પ્રથમ બેટિંગ કરતા ઓસ્ટ્રેલિયાની ટીમે 7 વિકેટ ગુમાવીને 352 રન બનાવ્યા હતા. જવાબમાં ભારતીય ટીમ 286 રન પર જ સિમિત રહી હતી. તમને જણાવી દઈએ કે વર્લ્ડ કપ 2023 પહેલા ટીમ ઈન્ડિયાની આ છેલ્લી ઈન્ટરનેશનલ મેચ હતી. આ પછી ભારતીય ટીમ સીધી વોર્મ-અપ મેચમાં ઉતરવા જઈ રહી છે.
ટાર્ગેટથી પાછળ પડી ગઈ ટીમ ઈન્ડિયા
આ મેચમાં જ્યારે ભારતીય ટીમ 352 રનના લક્ષ્યનો પીછો કરવા ઉતરી ત્યારે કેપ્ટન રોહિત શર્માએ શાનદાર બેટિંગ કરી હતી. જોકે, તેને બીજા છેડેથી વોશિંગ્ટન સુંદર (18)નો સાથ મળી શક્યો ન હતો. રોહિતે આ મેચમાં માત્ર 57 બોલમાં 81 રનની ઇનિંગ રમી હતી. જેમાં 6 છગ્ગા અને 5 ચોગ્ગા સામેલ હતા.
આ ઉપરાંત 56 રનની અડધી સદી પણ વિરાટ કોહલીના બેટમાંથી આવી હતી. જ્યારે શ્રેયસ અય્યરના બેટમાંથી 48 રન આવ્યા હતા. પરંતુ આમાંથી કોઈ પણ ખેલાડી પોતાની ઇનિંગ્સને મોટી બનાવી શક્યો ન હતો. ત્યાર બાદ કેએલ રાહુલ (26), સૂર્યકુમાર યાદવ (8) અને રવીન્દ્ર જાડેજા (35) બેટિંગથી કંઈ ખાસ કરી શક્યા ન હતા. ઓસ્ટ્રેલિયા માટે ગ્લેન મેક્સવેલે 4 વિકેટ લઈને પોતાની ટીમને જીત અપાવી હતી.
ઓસ્ટ્રેલિયાએ 352 રન બનાવ્યા હતા
આ મેચમાં ઓસ્ટ્રેલિયાની ટીમે પ્રથમ બેટિંગ કરતા 7 વિકેટ ગુમાવીને 357 રન બનાવ્યા હતા. ઓસ્ટ્રેલિયા તરફથી ઓપનિંગ કરવા આવેલા ડેવિડ વોર્નરે 56 રનની ઇનિંગ રમી હતી. જ્યારે મિશેલ માર્શના બેટમાંથી 96 રન આવ્યા હતા. આ સિવાય સ્ટીવ સ્મિથે 74 રન અને માર્નસ લાબુશેને 72 રન બનાવ્યા હતા. ટીમ ઈન્ડિયા તરફથી બુમરાહની 3 વિકેટ ઉપરાંત 2 વિકેટ કુલદીપ યાદવે અને એક-એક વિકેટ પ્રસિદ્ધ કૃષ્ણા અને મોહમ્મદ સિરાજે લીધી હતી.
