પૂંછ, ઉરી સહીત જમ્મુ-કાશ્મીરનાં અનેક વિસ્તારોમાં પાકિસ્તાની સેના કરી રહી છે ગોળીબાર, સાયરનથી ગૂંજી ઘાટી

11 કલાકની શાંતિ બાદ પાકિસ્તાની સેનાએ ફરી એકવાર ગોળીબાર શરૂ કરી દીધો છે. પૂંછ ઉપરાંત, પાકિસ્તાની સેના જમ્મુના ઉરી સેક્ટર, કુપવાડા સેક્ટર, તંગધાર સેક્ટર, લીપા વિસ્તાર અને મેંધાર સેક્ટરમાં પણ ગોળીબાર કરી રહી છે. પાકિસ્તાની ગોળીબાર શરૂ થતાં જ આખી ખીણમાં સાયરન વાગવા લાગ્યા. પાકિસ્તાની સેના પૂંછના દિગવાર અને કરમદા સેક્ટરમાં ગોળીબાર કરી રહી છે. પૂંછના ઘણા રહેણાંક વિસ્તારોને નિશાન બનાવવામાં આવ્યા હતા. આનાથી નાગરિકોના ઘરો અને વાહનોને ઘણું નુકસાન થયું છે.8-9 મે 2025 ની રાત્રે થયેલા ગોળીબારમાં, પોલીસ લાઇન પૂંછ પર હુમલો થયો. સ્થાનિક વહીવટીતંત્રે સરહદ નજીક રહેતા નાગરિકોને સલામત સ્થળોએ ખસેડ્યા છે. તાજેતરમાં, પૂંછના એક ઘરમાંથી મળેલા સીસીટીવી ફૂટેજમાં પાકિસ્તાની ગોળીબારના પુરાવા મળ્યા છે.

પાકિસ્તાને જમ્મુ-કાશ્મીરનાઆ વિસ્તારોમાં કર્યો હુમલો 

પૂંછ અને આસપાસના વિસ્તારોમાં ગોળીબાર અને તણાવ વચ્ચે સાયરનના અવાજ સંભળાયા. વિદેશ મંત્રાલય અને ભારતીય સેનાની સંયુક્ત પત્રકાર પરિષદમાં કહેવામાં આવ્યું હતું કે પાકિસ્તાને પૂંછ, તંગધાર, ઉરી, મેંધાર, રાજૌરી, અખનૂર અને ઉધમપુરમાં ભારે શસ્ત્રો અને સશસ્ત્ર ડ્રોનનો ઉપયોગ કર્યો હતો. પાકિસ્તાને પૂંછમાં એક ગુરુદ્વારા પર પણ હુમલો કર્યો હતો, જેની ભારતે સખત નિંદા કરી હતી. ભારતીય સેનાએ પણ આ હુમલાઓનો યોગ્ય જવાબ આપ્યો     

ઓપરેશન સિંદૂરથી પાકિસ્તાન હચમચી ગયુ 

આ ગોળીબાર ભારતના 'ઓપરેશન સિંદૂર'ના જવાબમાં થઈ રહ્યો છે, જેમાં 7 મે, 2025 ના રોજ ભારતે પાકિસ્તાન અને પીઓકેમાં 9 આતંકવાદી ઠેકાણાઓ પર હવાઈ હુમલા કર્યા હતા. આ કાર્યવાહીમાં લશ્કર-એ-તૈયબા, જૈશ-એ-મોહમ્મદ અને હિઝબુલ મુજાહિદ્દીનના ઠેકાણાઓનો નાશ કરવામાં આવ્યો હતો. ઓપરેશન સિંદૂર બાદ પાકિસ્તાન ગભરાઈ ગયું છે, જેના કારણે તેણે પૂંછ અને અન્ય સરહદી વિસ્તારોમાં ગોળીબાર તીવ્ર બનાવી દીધો છે.